സൗദി അറേബ്യയുടെ നേതൃത്വത്തിൽ സുഡാനിലിലെ ഇന്ത്യക്കാരടക്കമുള്ളവരുടെ ഒഴിപ്പിക്കൽ തുടരുന്നു

ആഭ്യന്തര സംഘർഷം രൂക്ഷമായ സുഡാനിൽ നിന്ന് സൗദി അറേബ്യയുടെ നേതൃത്വത്തിൽ ഇന്ത്യക്കാരടക്കമുള്ളവരുടെ ഒഴിപ്പിക്കൽ തുടരുന്നു.​ ഇന്ത്യക്കാരടക്കമുള്ളവരേയും വഹിച്ചുള്ള സൗദി കപ്പലുകൾ വരും ദിനങ്ങളിലും തുടരും. ഇന്ത്യക്കാരെ ജിദ്ദയിൽ നിന്നും വിമാനമാർഗം നാട്ടിലെത്തിക്കും

ശനിയാഴ്​ച ഉച്ചക്ക്​ ശേഷമാണ് ആദ്യ കപ്പൽ ജിദ്ദ തുറമുഖത്തെത്തിയത്​. 50 സൗദി പൗരന്മാരും മറ്റ്​ വിവിധ രാജ്യക്കാരുമാണ്​ കപ്പിലുണ്ടായിരുന്നത്​. തുടർന്നും നിരവധി കപ്പലുകളെത്തി.

രക്ഷപ്പെ​ട്ടെത്തിയവരിൽ ഇന്ത്യാക്കാരും ഉണ്ട്​. ഇതുവരെ 91 സൗദി പൗരന്മാരെയും വിവിധ രാജ്യക്കാരായ ഏകദേശം 66 ആളുകളെയും സൗദിയിലെത്തിച്ചതായി വിദേശകാര്യ മന്ത്രാലയം അറിയിച്ചു.

സൗദിയെയും ഇന്ത്യയെയും കൂടാതെ കുവൈത്ത്, ഖത്തർ, യു.എ.ഇ, ഈജിപ്ത്, തുനീഷ്യ, പാകിസ്​താൻ, ബൾഗേറിയ, ബംഗ്ലാദേശ്, ഫിലിപ്പീൻസ്, കാനഡ, ബുർക്കിന ഫാസോ എന്നീ രാജ്യങ്ങളിൽ നിന്നുള്ളവരെയും രക്ഷപ്പെടുത്തി ജിദ്ദയിലെത്തിച്ചു​.

ജിദ്ദയിലെത്തിയ വിദേശ പൗരന്മാർക്ക്​ ആവശ്യമായ എല്ലാ അടിസ്ഥാന സൗകര്യങ്ങളും അതത്​ രാജ്യങ്ങളിലേക്ക്​ പോകുന്നതിനുള്ള യാത്രാസൗകര്യങ്ങളും ഒരുക്കാനുള്ള തയ്യാറെടുപ്പിലാണ്​ സൗദി അറേബ്യ.

ഇന്ത്യക്കാരെ നാട്ടിലേക്ക് കൊണ്ടു പോകാൻ രണ്ട് വ്യോമസേനാ വിമാനങ്ങൾ ജിദ്ദയിലുണ്ട്. ഇവ നേരിട്ട് ജിദ്ദക്കും സുഡാനുമിടയിൽ സർവീസ് നടത്തുമെന്നാണ് അറിയിച്ചിരുന്നതെങ്കിലും സാഹചര്യം പ്രതികൂലമാവുകയായിരുന്നു. ഇന്ത്യക്കാർക്ക് ജിദ്ദയിൽ കോൺസുലേറ്റിന് കീഴിൽ താമസ സൗകര്യവും ഒരുക്കിയിട്ടുണ്ട്.