പ്രവാസികളുടെ വർക്ക് പെർമിറ്റ് ലളിതമാക്കാൻ ഒമാൻ തൊഴിൽ മന്ത്രാലയം

മസ്കത്ത്: നടപടിക്രമങ്ങൾ ലളിതമാക്കുന്നതിനും ചെലവ് കുറയ്ക്കുന്നതിനുമായി വർക്ക് പെർമിറ്റ് ചട്ടങ്ങളിൽ ഭേദഗതികൾ കൊണ്ടുവന്ന് ഒമാൻ തൊഴിൽ മന്ത്രാലയം. പു​തി​യ ന​ട​പ​ടി​ പ്ര​കാ​രം, പ്ര​വാ​സി തൊ​ഴി​ലാ​ളി​ക​ളു​ടെ താമസ കാലാവധിയനുസരിച്ചാണ് വ​ർ​ക്ക് പെ​ർ​മി​റ്റു​ക​ൾ രൂപപ്പെടുത്തിയിരിക്കുന്നത്. ഗാർഹിക തൊഴിലാളി നിയമനവുമായി ബന്ധപ്പെട്ട് നിലവിലുള്ള നിയമങ്ങൾ നിലനിർത്തും. ഭി​ന്ന​ശേ​ഷിക്കാർ, മു​തി​ർ​ന്ന പൗ​ര​ന്മാ​ർ, രോ​ഗി​ക​ൾ എന്നിവരുടെ പരിചരണത്തിന് നി​യ​മി​ക്കു​ന്ന വീ​ട്ടു​ജോ​ലി​ക്കാ​രു​ടെ പെ​ർ​മി​റ്റ് ഫീ​സു​ക​ൾ പൂർണമായി ഒ​ഴി​വാ​ക്കുമെന്നും മന്ത്രാലയം അറിയിച്ചു.

പു​തി​യ പെ​ർ​മി​റ്റ് ഇല്ലാതെ തന്നെ ചെറിയ ഫീസ് വ്യത്യാസത്തിൽ തൊ​ഴി​ലുടമകൾക്ക് ഇനി മുതൽ തൊ​ഴി​ലാ​ളി​യു​ടെ ജോ​ലി​ കാറ്റ​ഗറി മാ​റ്റാ​ൻ സാധിക്കും. ചാരിറ്റി, പ​ള്ളി​ക​ൾ തു​ട​ങ്ങി സി​വി​ൽ സൊ​സൈ​റ്റി, മ​നു​ഷ്യാ​വ​കാ​ശ സം​ഘ​ട​ന​ക​ൾ​ക്കും മ​ത​സ്ഥാ​പ​ന​ങ്ങ​ൾ​ക്കും ഫീ​സ് ഇളവ് പ്ര​ഖ്യാ​പി​ച്ചി​ട്ടു​ണ്ട്. നേ​ര​ത്തെ 141 ഒ​മാ​നി റി​യാ​ലുണ്ടായിരുന്നത് 101 ഒ​മാ​നി റി​യാ​ലാ​യി ചു​രു​ക്കി. സ്വദേശിവത്കരണം മാ​ന​ദ​ണ്ഡമായി പ്രവർത്തിക്കുന്ന സ്ഥാ​പ​ന​ങ്ങ​ൾ​ക്ക് 30 ശ​ത​മാ​നം വരെ ഫീ​സ് ഇളവ് നൽകും. എന്നാൽ നി​ശ്ച​യി​ച്ച സ്വദേശിവത്കരണം മാനദ​ണ്ഡമാക്കാത്ത സ്ഥാപനങ്ങൾക്ക് ഇ​ര​ട്ടി ഫീ​സാകും ഈ​ടാ​ക്കുക.

കൃ​ത്യ​സ​മ​യ​ത്ത് തൊഴിലാളികളുടെ വ​ർ​ക്ക് പെ​ർ​മി​റ്റ് പു​തു​ക്കാ​ത്ത​വ​ർ​ക്ക് പ​ര​മാ​വ​ധി 500 ഒ​മാ​നി റി​യാ​ൽ വ​രെ പി​ഴ ല​ഭി​ക്കും. അ​തേ​സ​മ​യം തൊ​ഴി​ലാ​ളി​യു​ടെ മ​ര​ണം, വി​സ മാ​റ്റം, തൊ​ഴി​ലാ​ളി രാ​ജ്യം വി​ടുക തു​ട​ങ്ങി​യ സാ​ഹ​ച​ര്യ​ങ്ങ​ളി​ൽ ഫീ​സ് ഇളവുണ്ടാകും. വി​സ അം​ഗീ​കാ​രം ല​ഭി​ക്കാ​തിരിക്കുക, മെ​ഡി​ക്ക​ൽ പ​രി​ശോ​ധ​ന പ​രാ​ജ​യപ്പെടുക, തൊ​ഴി​ലാ​ളി​യു​ടെ മ​ട​ക്കം, 90 ദി​വ​സ​ത്തി​നു​ള്ളി​ലെ ജോ​ലി​മാ​റ്റം എ​ന്നി​ങ്ങനെ പെ​ർ​മി​റ്റ് ഉ​പ​യോ​ഗി​ക്കാ​നാ​കാ​ത്ത സാ​ഹ​ച​ര്യ​ത്തി​ൽ റീ​ഫ​ണ്ടോ കു​റ​ഞ്ഞ ഫീ​സി​ൽ പ​ക​രം പെ​ർ​മി​റ്റോ ലഭിക്കുന്നതായിരിക്കും.

തൊ​ഴിലുടമയുടെ മ​ര​ണം, തൊ​ഴി​ലാ​ളി ജ​യി​ലി​ലാ​വു​ക, അ​ല്ലെ​ങ്കി​ൽ പാ​സ്പോ​ർ​ട്ട് അ​ധി​കൃ​ത​ർ പി​ടി​ച്ചെ​ടു​ക്കു​ക തുടങ്ങിയ സാ​ഹ​ച​ര്യ​ങ്ങ​ളി​ൽ പെർമിറ്റ് കാലതാമസത്തിനുള്ള പി​ഴ ഒ​ഴി​വാ​ക്കു​മെ​ന്ന് മ​ന്ത്രാ​ല​യം വ്യ​ക്ത​മാ​ക്കി. തൊഴിൽ വിപണിയിലെ കാര്യക്ഷമത വർധിപ്പിക്കുന്നതിന്റെ ഭാഗമായാണ് നടപടികളെന്ന് മന്ത്രാലയം അറിയിച്ചു.