ദമ്മാം കൊണ്ടോട്ടിയൻസ് ജനറൽ ബോഡി യോഗം സംഘടിപ്പിച്ചു

ദമ്മാം: സൗദി കിഴക്കൻ പ്രവിശ്യയിലെ കൊണ്ടോട്ടിക്കാരുടെ കൂട്ടായ്മയായ കൊണ്ടോട്ടിയൻസ് പ്രവർത്തകരുടെ ജനറൽ ബോഡി യോഗം ചേർന്നു. യോഗം പ്രസിഡന്റ് ആലിക്കുട്ടി ഒളവട്ടൂർ ഉദ്ഘാടനം ചെയ്തു. സെപ്റ്റംബർ 26 നു സ്‌കൂൾ അവധിക്ക് ശേഷം കിഴക്കൻ പ്രവിശ്യയിലെ എല്ലാ കൊണ്ടോട്ടിയൻസിനെയും മറ്റു മലയാളി സമൂഹത്തെയും കുടുംബ സമേതം പങ്കെടുപ്പിച്ച് കൊണ്ടോട്ടി മഹോത്സവം 'വൈദ്യർ നൈറ്റ്' എന്ന പേരിൽ വിപുല പരിപാടി സംഘടിപ്പിക്കാൻ തീരുമാനിച്ചു.

പരിപാടിയുടെ കരട് രൂപം കൺവീനർ സിദ്ദിഖ് ആനപ്ര അവതരിപ്പിച്ചു. റിയാസ്. എം, ആസിഫ് കൊണ്ടോട്ടി, റസാഖ് ബാവു എന്നിവർ വിവിധ പദ്ധതികൾ അവതരിപ്പിച്ചു. പരിപാടിയുടെ ഓൺലൈൻ കാമ്പയിൻ, ഫ്ളൈർ ഡിസൈൻ, സോഷ്യൽ മീഡിയ പ്രവർത്തനങ്ങൾ എന്നിവയുടെ ചുമതല ഷമീർ ജുബൈൽ, അനീസ് കൊട്ടപ്പുറം, ഷമീർ കൊണ്ടോട്ടി എന്നിവരെ ചുമതലപ്പെടുത്തി. നോർക്ക, കേരള പ്രവാസി വെൽഫെയർ ബോർഡ് തുടങ്ങിയ പദ്ധതികളിൽ അംഗത്വമെടുക്കുന്നതിനുള്ള മാർഗനിർദേശങ്ങൾ നൽകുന്നതിന് അബ്ദുൽ നാസർ പി.ഇ. യുടെ നേതൃത്വത്തിൽ പ്രത്യേക സമിതി രൂപീകരിക്കപ്പെട്ടു.

ചെയർമാൻ അബ്ദുൽഹമീദ് ഹമീദ് സി. അധ്യക്ഷത വഹിച്ചു. ജനറൽ സെക്രട്ടറി അഷ്റഫ് കൊണ്ടോട്ടി സ്വാഗതവും ഓർഗനൈസിംഗ് സെക്രട്ടറി ഷമീർ കൊണ്ടോട്ടി നന്ദിയും പറഞ്ഞു.