പൊളിച്ച കെട്ടിട അവശിഷ്ടങ്ങൾ റോഡ് നിർമ്മാണത്തിന് ഉപയോഗിച്ച് സൗദി അറേബ്യ

റിയാദ്: പരിസ്ഥിതി സംരക്ഷണത്തിനും അടിസ്ഥാന സൗകര്യ വികസനത്തിനും ഊന്നൽ നൽകി സൗദി അറേബ്യയിൽ പുതിയ റോഡ് നിർമ്മാണ രീതിക്ക് തുടക്കം. പൊളിച്ചെടുക്കുന്ന കെട്ടിടങ്ങളുടെ അവശിഷ്ടങ്ങൾ റോഡ് നിർമ്മാണത്തിനുള്ള ടാർ (ആസ്ഫാൾട്ട്) ഉത്പാദനത്തിന് ഉപയോഗിക്കുന്നതാണ് ഈ നൂതന പദ്ധതി. ചെലവ് കുറഞ്ഞതും ഉയർന്ന ഗുണമേന്മയുമുള്ള റോഡുകൾ നിർമ്മിക്കാൻ ഇത് സഹായിക്കുമെന്ന് അധികൃതർ അറിയിച്ചു.

അൽ അഹ്‌സ ഗവർണറേറ്റിലായിരുന്നു ഈ പദ്ധതിയുടെ ആദ്യ പരീക്ഷണം. പൊളിച്ച കെട്ടിടങ്ങളിൽ നിന്നുള്ള ബ്ലോക്കുകൾ, കോൺക്രീറ്റ് തുടങ്ങിയവ ക്രഷ് ചെയ്തെടുത്താണ് ആസ്ഫാൾട്ട് നിർമ്മാണത്തിനായി ഉപയോഗിക്കുന്നത്. റോഡ് ജനറൽ അതോറിറ്റിയും മുനിസിപ്പാലിറ്റിയുമായി സഹകരിച്ചാണ് ഈ സംരംഭം നടപ്പാക്കുന്നത്. ആദ്യ ഘട്ടത്തിലെ വിജയകരമായ പരീക്ഷണത്തിന് ശേഷം റിയാദിലും ഈ രീതി പരീക്ഷിച്ചു.

പദ്ധതിയുടെ രണ്ടാം ഘട്ടവും വിജയകരമായതോടെ, രാജ്യത്തിന്റെ വിവിധ ഭാഗങ്ങളിൽ ഈ നൂതന രീതിയിലുള്ള റോഡ് നിർമ്മാണം വ്യാപിപ്പിക്കാൻ അതോറിറ്റി ഒരുങ്ങുകയാണ്. ഇത് രാജ്യത്തിന്റെ റോഡ് ശൃംഖലയുടെ വികസനത്തിന് ആക്കം കൂട്ടുകയും അതോടൊപ്പം പരിസ്ഥിതി സൗഹൃദമായ നിർമ്മാണ രീതികൾക്ക് മാതൃകയാകുകയും ചെയ്യും.