സൗദിയിലെ ഭക്ഷണശാലകളിൽ ചേരുവകൾ നിർബന്ധമായും വെളിപ്പെടുത്തണം; ജൂലൈ മുതൽ നിയമം പ്രാബല്യത്തിൽ

റിയാദ്: ഉപഭോക്താക്കൾക്ക് ആരോഗ്യകരമായ ഭക്ഷണം ഉറപ്പാക്കുന്നതിന്റെ ഭാഗമായി സൗദിയിലെ എല്ലാ ഭക്ഷണശാലകളും വിൽക്കുന്ന ഭക്ഷണ പദാർത്ഥങ്ങളിലെ ചേരുവകൾ നിർബന്ധമായും വെളിപ്പെടുത്തണമെന്ന് സൗദി ഫുഡ് ആൻഡ് ഡ്രഗ് അതോറിറ്റി (SFDA) ഉത്തരവിറക്കി. 2025 ജൂലൈ ഒന്ന് മുതൽ ഈ നിയമം കർശനമായി പ്രാബല്യത്തിൽ വരുമെന്ന് അതോറിറ്റി അറിയിച്ചു.

ഈ പുതിയ നിയമം റെസ്റ്റോറന്റുകൾ, കഫേകൾ, ഓൺലൈൻ ഡെലിവറി പ്ലാറ്റ്ഫോമുകൾ എന്നിവ ഉൾപ്പെടെ എല്ലാതരം ഭക്ഷണ വിതരണ സ്ഥാപനങ്ങൾക്കും ബാധകമാണ്. പ്രിന്റ് ചെയ്ത മെനുവിലും ഓൺലൈൻ മെനുവിലും ഭക്ഷണത്തിലെ ചേരുവകൾ വ്യക്തമായി രേഖപ്പെടുത്തണം. ഇത് ഉപഭോക്താക്കൾക്ക് തങ്ങൾ കഴിക്കുന്ന ഭക്ഷണത്തെക്കുറിച്ച് വ്യക്തമായ ധാരണ നൽകാനും ആരോഗ്യകരമായ ഭക്ഷണരീതി തെരഞ്ഞെടുക്കാനും സഹായിക്കും.

ഭക്ഷണ പദാർത്ഥങ്ങളിലെ ചേരുവകൾക്ക് പുറമെ ഇനിപ്പറയുന്ന വിവരങ്ങളും മെനുവിൽ ഉൾപ്പെടുത്തണം.

1. ഉപ്പ് കൂടുതലടങ്ങിയ ഭക്ഷണങ്ങൾക്ക് സമീപം ഒരു സാൾട്ട് ഷേക്കറിന്റെ ചിഹ്നം നിർബന്ധമായും പ്രദർശിപ്പിക്കണം.
2. പാനീയങ്ങളിലെ കഫീന്റെ അളവ് കൃത്യമായി രേഖപ്പെടുത്തണം.
3. ഓരോ ഭക്ഷണ പദാർത്ഥത്തിലെയും കലോറി അളവ് വ്യക്തമാക്കുകയും, ആ കലോറി എരിച്ചുകളയാൻ സാധാരണയായി എത്ര സമയം എടുക്കും എന്നതിന്റെ വിവരവും നൽകണം.

ഉപഭോക്താക്കൾക്ക് വ്യക്തമായ ഭക്ഷ്യ വിവരങ്ങൾ നൽകുക, ആരോഗ്യകരമായ ഭക്ഷണക്രമം പിന്തുടരാൻ അവരെ പ്രേരിപ്പിക്കുക, കൂടാതെ രാജ്യത്തെ ഭക്ഷണ വ്യാപാര മേഖലയിലെ സുതാര്യതയും വികസനവും ഉറപ്പാക്കുക എന്നിവയാണ് ഈ നീക്കത്തിന്റെ പ്രധാന ലക്ഷ്യങ്ങൾ