യുഎഇയിലും വിപുലമായ ഇന്ത്യൻ സ്വാതന്ത്ര്യദിനാഘോഷം; അബൂദബിയിലും ദുബൈയിലും ചടങ്ങുകൾ

യുഎഇയിലും വിപുലമായ തോതിൽ ഇന്ത്യൻ സ്വാതന്ത്ര്യദിനാഘോഷം. ഉഭയകക്ഷി ബന്ധം ഏറ്റവും ശക്തമായ സാഹചര്യത്തിൽ നിരവധി സ്വദേശി പ്രമുഖരും ഇന്ത്യയുടെ സ്വാതന്ത്ര്യ ദിനാഘോഷ പരിപാടികളിൽ പങ്കുചേർന്നു. ലോകോത്തര കെട്ടിടമായ ദുബൈ ബുർജ്​ ഖലീഫ ത്രിവർണമണിഞ്ഞു.

അബൂദബിയിലെ ഇന്ത്യന്‍ എംബസി അങ്കണത്തിൽ ആയിരുന്നു യുഎഇയിലെ പ്രധാന സ്വാതന്ത്ര്യദിനാഘോഷ പരിപാടി. അംബാസഡർ സഞ്​ജയ്​ സുധീർ ദേശീയപതാക ഉയര്‍ത്തി. തുടർന്ന്​ പ്രവാസി സമൂഹത്തെ അ​ദ്ദേഹം അഭിസംബോധന ചെയ്​തു. വരുന്ന 25 വര്‍ഷം കൊണ്ട് ഇന്ത്യയെ വികസിത രാജ്യമാക്കി മാറ്റാൻ പ്രധാനമന്ത്രി നരേന്ദ്രമോദി മുന്നോട്ടുവച്ച പ്രതിജ്ഞകള്‍ സഞ്ജയ് സുധീര്‍ അനുസ്​മരിച്ചു. വിവിധ കലാപരിപാടികളും അരങ്ങേറി.

ദുബൈ ഇന്ത്യൻ കോൺസുലേറ്റിൽ നടന്ന ചടങ്ങിൽ കോൺസുൽ ജനറൽ ഡോ. അമൻ പുരി പതാക ഉയർത്തി. നൂറൂകണക്കിന്​ ഇന്ത്യൻ പ്രവാസികൾ ചടങ്ങിനെത്തി. വിവിധ കൂട്ടായ്​മകളുടെ ആഭിമുഖ്യത്തിൽ ആഘോഷ പരിപാടികളും നടന്നു. ഇന്ത്യൻ അസോസിയേഷനുകളുടെയും പ്രവാസി കൂട്ടായ്​മകളുടേയും ആഭിമുഖ്യത്തിൽ വിവിധ ആഘോഷ പരിപാടികളാണ്​ യുഎഇയിൽ നടന്നത്​. രാജ്യത്തിന്റെ സ്വാതന്ത്ര്യം നിലനിർത്താൻ കൂടുതൽ രാഷ്​ട്രീയ ഇടപെടലുകൾ ആവശ്യമാണെന്ന്​ വിവിധ ചടങ്ങുകളിൽ പ​​ങ്കെടുത്ത പ്രവാസി നേതാക്കൾ ഓർമിപ്പിച്ചു.