ഗൾഫിൽ IFFK എഡിഷൻ സംഘടിപ്പിക്കുമെന്ന് ചലച്ചിത്ര അക്കാദമി ചെയർമാൻ റസൂൽ പൂക്കുട്ടി

ദുബൈ: ഗൾഫ് ഉൽപ്പെടെ വിവിധ രാജ്യങ്ങളിൽ IFFK എഡിഷൻ സംഘടിപ്പിക്കുമെന്ന് ചലച്ചിത്ര അക്കാദമി ചെയർമാൻ റസൂൽ പൂക്കുട്ടി. പകുതിയിലധികം മലയാള സിനിമകളും നിർമിക്കുന്നത് ​ഗൾഫിലെ പ്രവാസികളാണെന്നും അദ്ദേ​​ഹം യുഎഇയിൽ നടന്ന വാർത്ത സമ്മേളനത്തിൽ പറഞ്ഞു.

സർക്കാർ ഏജൻസികൾക്ക് IFFK സൗജന്യ പാസുകൾ നൽകുന്നത് നിർത്തലാക്കും. പാസുകൾ സിനിമയെ സ്നേഹിക്കുന്നവർക്ക് മാത്രമാക്കുന്നതിനാണ് തീരുമാനം. കാൻ ഉൾപ്പടെയുള്ള മേളകളിലും IFFK യിലെ മലയാളസിനിമകൾ പ്രദർശിപ്പിക്കാൻ നടപടിയുണ്ടാകുമെന്നും റസൂൽ പൂക്കുട്ടി അറിയിച്ചു.

സിനിമയിലെ 35 % ജോലികളും എഐ ഇല്ലാതാക്കും. തിയേറ്ററുകളിൽ BIS നിലവാരം ഏർപ്പെടുത്തുന്നത് ആലോചനയിലുണ്ടെന്നും വാർത്താ സമ്മേളനത്തിൽ അദ്ദേഹം പങ്കുവെച്ചു. കേരളത്തിന്റെ രാഷ്ട്രീയ ചരിത്രവുമായി ബന്ധപ്പെട്ട മലയാള സിനിമ ചെയ്യുന്നത് തന്റെ സ്വപ്നമാണെന്നും അതിന്റെ തിരക്കഥാ ജോലികൾ നടക്കുന്നുവെന്നും അദ്ദേഹം കൂട്ടിച്ചേർത്തു.