അറ്റകുറ്റപ്പണി; ദുബൈ പാം മോണോറെയിൽ സർവീസ് താത്കാലികമായി നിർത്തിവെച്ചു

ദുബൈ: ദുബൈ പാം ജുമൈറയിലെ പൊതുഗതാഗത സംവിധാനമായ പാം മോണോറെയിലിന്റെ സർവീസ് താത്കാലികമായി നിർത്തിവെച്ചതായി അധികൃതർ അറിയിച്ചു. അറ്റകുറ്റപ്പണികൾ നടക്കുന്നതിനാലാണ് നിർത്തിവെക്കൽ.

വിനോദസഞ്ചാരികൾക്കിടയിൽ ജനപ്രിയമായ ഈ മോണോറെയിൽ പാം ഗേറ്റ്‌വേ മുതൽ അറ്റ്‌ലാന്റിസ് അക്വാവെഞ്ചർ വരെയുള്ള നാല് പ്രധാന സ്റ്റേഷനുകളിലൂടെ 5.5 കിലോമീറ്റർ ദൂരമാണ് സർവീസ് നടത്തുന്നത്. പാം ജുമൈറ ദ്വീപിലെ ഏക പൊതുഗതാഗത സംവിധാനം കൂടിയാണിത്. സിംഗിൾ ട്രിപ്പിന് 5 ദിർഹം മുതലും റൗണ്ട് ട്രിപ്പിന് 10 ദിർഹം മുതലുമാണ് ടിക്കറ്റ് നിരക്ക്.

മോണോറെയിലിന്റെ ഔദ്യോ​ഗിക അക്കൗണ്ടുകൾ വഴി സർവീസ് പുനരാരംഭിക്കുന്നതിനെക്കുറിച്ചുള്ള അപ്ഡേഷനുകൾ ലഭിക്കും. മോണോറെയിൽ സർവീസ് നിലച്ച സാഹചര്യത്തിൽ പാം ജുമൈറയിൽ സഞ്ചരിക്കാൻ താമസക്കാർക്കും വിനോദസഞ്ചാരികൾക്കും ആർടിഎയുടെ ഹല ടാക്സി സർവീസ് ഉപയോഗിക്കാം.