യുഎഇയിൽ സോഷ്യൽ മീഡിയ ഇൻഫ്ലുവൻസേഴ്സിന്റെ പരസ്യത്തിന് പെർമിറ്റ് നിർബന്ധം

ദുബൈ: യുഎഇയിൽ സോഷ്യൽ മീഡിയ ഇൻഫ്ലുവൻസേഴ്സിനും പരസ്യദാതാക്കൾക്കും ഇന്ന് മുതൽ പരസ്യത്തിന് പെർമിറ്റ് നിർബന്ധമെന്ന് യുഎഇ മീഡിയ കൗൺസിൽ. ഇന്ന് മുതൽ നിയമെ പ്രാബല്യത്തിൽ വരും. സോഷ്യൽ മീഡിയയിലെ എല്ലാ പെയ്ഡ് അൺ പെയ്ഡ് പ്രൊമോഷൻസിനും, വെബ്സൈറ്റ്, ബ്ലോ​ഗ് പോലുള്ള എല്ലാ ഡിജിറ്റൽ പ്ലാറ്റ്ഫോമിനും നിയമം ബാധകമാണ്.

പരസ്യത്തെ പ്രൊഫഷണലും, സുതാര്യവും, വിശ്വസനീയവുമാക്കുക, തെറ്റിദ്ധരിപ്പിക്കുന്ന കണ്ടന്റുകൾ ജനങ്ങളിലേക്കെത്തിക്കാതിരിക്കുക എന്നതാണ് പുതിയ നിയമത്തിൻ്റെ ലക്ഷ്യം. 2023 ലെ ഫെഡറൽ മീഡിയ ലോ നമ്പർ 55 പ്രകാരമാണ് ഈ നിയന്ത്രണം. പ്രിന്റ്, ബ്രോഡ്കാസ്റ്റ്, ഓൺലൈൻ പബ്ലിക്കേഷൻ, സ്പോൺസേർഡ് കണ്ടന്റ് തുടങ്ങി എല്ലാ മേഖലക്കും ഇത് ബാധകമാണ്. അനുമതിക്ക് അപേക്ഷിക്കുന്നവർ 18 വയസ്സോ അതിന് മുകളിലോ ഉള്ളവരായിരിക്കണം. വിദ്യാഭ്യാസം, കല, കായികം തുടങ്ങിയ മേഖലകളിൽ കണ്ടന്റ് ചെയ്യുന്ന 18 വയസ്സിന് താഴെ പ്രായമുള്ളവരാണെങ്കിൽ അവരും നിയമം പാലിക്കേണ്ടതാണ്.