ടാക്സിക്കായി കാത്തിരിക്കേണ്ടി വന്നത് രണ്ട് മണിക്കൂര്‍; വൈറലായി ബംഗളൂരു വിമാനത്താവളത്തിലെ ഊബറിനു വേണ്ടിയുള്ള ക്യൂ

ബംഗളൂരു: ബംഗളൂരു എന്ന് കേട്ടാൽ ഇപ്പോൾ മെട്രോ നഗരം എന്നതിനെക്കാൾ പലര്‍ക്കും ഓര്‍മ വരിക മണിക്കൂറുകൾ നീളുന്ന ഗതാഗതക്കുരുക്കായിരിക്കും. കിലോമീറ്ററുകൾ നീളുന്ന വാഹനങ്ങളുടെ നിര ബംഗളൂരുവിലെ സ്ഥിരം കാഴ്ചയാണ്. അതുപോലെയുള്ള ബംഗളൂരുവിൽ നിന്നുള്ള ഒരു ക്യൂവിന്‍റെ വീഡിയോയാണ് സോഷ്യൽമീഡിയയിൽ വൈറലായിക്കൊണ്ടിരിക്കുന്നത്. വാഹനങ്ങൾക്ക് പകരം ആളുകളാണ് ക്യൂവിൽ നിൽക്കുന്നതെന്ന് മാത്രം. കഴിഞ്ഞ ദിവസം രാത്രി കെംപെഗൗഡ അന്താരാഷ്ട്ര വിമാനത്താവളത്തിൽ വന്നിറങ്ങിയ യാത്രക്കാര്‍ക്ക് ടാക്സിക്കായി കാത്തിരിക്കേണ്ടി വന്നത് രണ്ട് മണിക്കൂറാണ്.

ബംഗളൂരു നിവാസിയായ ദിഷ സൈനിയാണ് ഇതിനെക്കുറിച്ച് എക്സിൽ പങ്കുവച്ചത്. "സമയം ലാഭിക്കാൻ വേണ്ടി രാത്രിയിൽ ബാംഗ്ലൂരിൽ ഇറങ്ങി, വിമാനത്താവളത്തിലെ ഉബർ പിക്കപ്പ് പോയിന്റ് ഇങ്ങനെയായിരുന്നു. ഇവിടെ 2 മണിക്കൂറിലധികം കാത്തിരുന്നു," ടാക്സികൾക്കായി കാത്തിരിക്കുന്ന യാത്രക്കാരുടെ അനന്തമായ ക്യൂ കാണിക്കുന്ന ഒരു വീഡിയോ പോസ്റ്റ് ചെയ്തുകൊണ്ട് ദിഷ കുറിച്ചു. പോസ്റ്റ് വളരെ പെട്ടെന്ന് തന്നെ വൈറലായി. കഴിഞ്ഞ കുറച്ചു മാസങ്ങളായി കെംപെഗൗഡ വിമാനത്താവളത്തിലെ സ്ഥിതി ഇതാണെന്നും സ്ഥിരം യാത്രക്കാര്‍ ചൂണ്ടിക്കാട്ടി.

"കഴിഞ്ഞ 8 മാസത്തോളമായി ഇതാണ് സ്ഥിതി. അതിനുമുമ്പ്, പകൽ ഏത് സമയത്തും അല്ലെങ്കിൽ രാത്രി വൈകിയും ക്യാബുകൾ ലഭ്യമായിരുന്നു. ഇപ്പോൾ T1 & T2 എന്നിവിടങ്ങളിൽ ഒല, ഊബര്‍, എയര്‍പോര്‍ട്ട്, റാപ്പിഡോ ക്യാബുകളുടെ ക്ഷാമമുണ്ട്" മറ്റൊരു ഉപയോക്താവ് അനുഭവം പങ്കുവച്ചു. ആപ്പ് അധിഷ്ഠിത ക്യാബുകൾക്ക് പകരം പൊതുഗതാഗതം ഉപയോഗിക്കാൻ മറ്റൊരാൾ നിർദേശിച്ചു: “പ്രിയ ഉപയോക്താവേ, KIA (kempegowda international airport )എസി ബസുകൾ നിലവിലുണ്ട്, നഗരത്തിന്റെ എല്ലാ ഭാഗങ്ങളിലേക്കും ഇവ പോകുന്നു ടാക്സികളെ അപേക്ഷിച്ച് വളരെ സൗകര്യപ്രദവും വിലകുറഞ്ഞതുമാണ്”. "മറ്റ് ചില നഗരങ്ങളിൽ നിന്ന് വ്യത്യസ്തമായി, ആളുകൾ ശാന്തമായി ക്യൂവിൽ കാത്തിരിക്കുന്നത് കാണാൻ സന്തോഷം" എന്ന് പറഞ്ഞുകൊണ്ട്, ബെംഗളൂരുവിന്റെ ക്ഷമയെ ചിലർ പ്രശംസിച്ചു.

ജനറൽ പിക്കപ്പ് ഏരിയയിൽ നിന്ന് റാപ്പിഡോ ബുക്ക് ചെയ്താണ് തങ്ങൾ ലൈനിൽ നിന്ന് രക്ഷപ്പെട്ടതെന്ന് ഒരു യാത്രക്കാരൻ പറഞ്ഞു, മറ്റൊരാൾ ബിഎംടിസി കിയ ബസ് തെരഞ്ഞെടുത്ത് ഒരു ഓട്ടോയിൽ വീട്ടിലേക്ക് പോയി. “ഒരു സ്ത്രീ അർദ്ധരാത്രിയിൽ ലഗേജുമായി ഒരു ബസ് സ്റ്റോപ്പിൽ ഒറ്റയ്ക്ക് ഇറങ്ങുന്നത് ഭയപ്പെടുത്തുന്നതായിരിക്കും. എനിക്ക് മനസ്സിലായി,” ഉപയോക്താവ് കൂട്ടിച്ചേർത്തു.

അതേസമയം, വിമാനത്താവള കണക്റ്റിവിറ്റി സുഗമമാക്കുന്നതിനുള്ള ശ്രമത്തിന്റെ ഭാഗമായി, വിമാനത്താവളത്തിനും നഗരത്തിനും ഇടയിലുള്ള ഗതാഗതം സുഗമമാക്കുന്നതിനായി ഉദ്ദേശിച്ചിട്ടുള്ള പുതിയ ഹെബ്ബാൾ ഫ്ലൈഓവർ ലൂപ്പിന്റെ നിർമാണം വേഗത്തിൽ പുരോഗമിക്കുകയാണെന്ന് ബംഗളൂരു വികസന അതോറിറ്റി (ബിഡിഎ) അറിയിച്ചു.

Landed in Bangalore at night to save time and this is what the uber pickup point looked like at the airport. Waited more than 2 hours here. pic.twitter.com/591c3fWnrZ

— Disha Saini🌻 (@justjalebi1) November 5, 2025