തമിഴ്നാട്ടിൽ ഇനിമുതൽ സ്വകാര്യ ആശുപത്രികളിൽ നിന്നും സൗജന്യ വാക്​സിൻ

തമിഴ്നാട്ടിൽ സർക്കാർ ആശുപത്രികൾക്ക് പിന്നാലെ സ്വകാര്യ ആശുപത്രികളിലും സൗജന്യ കോവിഡ്​ വാക്​സിനേഷൻ പദ്ധതിക്ക്​ തുടക്കം കുറിച്ച്​ സർക്കാർ. മുഖ്യമന്ത്രി എം.കെ. സ്​റ്റാലിൻ ചെന്നൈ കാവേരി ആശുപത്രിയിൽ പദ്ധതി ഉദ്​ഘാടനം ചെയ്​തു. 137 സ്വകാര്യ ആശുപത്രികളിലാണ്​ ആദ്യഘട്ടത്തിൽ പദ്ധതി നടപ്പാക്കുക.

സൗജന്യ വാക്സിനൊപ്പം പണം നൽകിയുള്ള വാക്​സിൻ കുത്തിവെപ്പെടുക്കാനും സ്വകാര്യ ആശുപത്രികളിൽ​ സൗകര്യമുണ്ടാകും. സ്വകാര്യ സ്​ഥാപനങ്ങൾ നൽകുന്ന കോർപറേറ്റ്​ സാമൂഹിക ഉത്തരവാദിത്ത(സി.എസ്​.ആർ) ഫണ്ട്​ ചെലവഴിച്ചാണ്​​ പദ്ധതി നടപ്പാക്കുക.

2.20 കോടി രൂപ സംഭാവന നൽകിയതിനുപുറമെ മറ്റു കമ്പനികളും ഫണ്ട്​ കൈമാറിയിരുന്നു. സ്വകാര്യ ആശുപത്രികളിലും സൗജന്യ വാക്​സിനേഷൻ നടപടികൾ ആരംഭിക്കുന്നതോടെ സർക്കാർ ആശുപത്രികളിലെ തിരക്ക്​ കുറയു​മെന്നാണ്​ വിലയിരുത്തൽ.