യു.പിയില് എം.എല്.എയെ ചെളിയില് കുളിപ്പിച്ച് ജനങ്ങള്, കാരണം...
|മഴദേവനായ ഇന്ദ്രനെ പ്രീതിപ്പെടുത്താൻ എം.എല്.എയെ ചെളിയില് കുളിപ്പിച്ച് ജനങ്ങള്
ഗൊരഖ്പൂര്: ഉത്തർപ്രദേശിലെ മഹാരാജ്ഗഞ്ചിലെ പിപ്രദേറയില് മഴ പെയ്യാന് എം.എല്.എയെ ചെളിയില് കുളിപ്പിച്ച് ജനങ്ങള്. ബി.ജെ.പി എം.എൽ.എ ജയ് മംഗൾ കനോജിയയെയും മുനിസിപ്പൽ കൗൺസിൽ പ്രസിഡന്റ് കൃഷ്ണ ഗോപാൽ ജയ്സ്വാളിനെയുമാണ് ചെളിയില് കുളിപ്പിച്ചത്.
ഒരാളുടെമേൽ ചെളി വാരിയെറിയുകയോ ചെളിയിൽ കുളിപ്പിക്കുകയോ ചെയ്യുന്നതിലൂടെ മഴദേവനായ ഇന്ദ്രനെ പ്രീതിപ്പെടുത്താന് കഴിയുമെന്നാണ് കിഴക്കൻ ഉത്തർപ്രദേശിലെ ഒരു വിഭാഗം ജനങ്ങളുടെ വിശ്വാസം. ഇപ്പോൾ ഇന്ദ്രൻ സന്തോഷവാനായിരിക്കുമെന്നും മഴ നല്കി അനുഗ്രഹിക്കുമെന്നും എം.എല്.എയെ ചെളിയില് കുളിപ്പിച്ച സ്ത്രീകള് പറഞ്ഞു.
കനത്ത ചൂടു കാരണം ജനങ്ങൾ കഷ്ടപ്പെടുകയാണെന്ന് എം.എല്.എ പറഞ്ഞു. വിളകള് കരിഞ്ഞുപോവുകയാണ്. കൊടും വരള്ച്ചയാണ്. അതിനാലാണ് താന് ചടങ്ങിൽ പങ്കെടുക്കാൻ സമ്മതിച്ചത്. ഇതൊരു പഴയ വിശ്വാസത്തെ അടിസ്ഥാനമാക്കിയുള്ള ആചാരമാണെന്നും എം.എല്.എ പ്രതികരിച്ചു.