അജിത് പവാർ കൊല്ലപ്പെട്ട വിമാനാപകടം; ആരായിരുന്നു ക്യാപ്റ്റൻ ശാംഭവി പഥക്?

മഹാരാഷ്ട്ര ഉപമുഖ്യമന്ത്രി അജിത് പവാർ കൊല്ലപ്പെട്ട വിമാനാപകടത്തിൽ ജീവൻ നഷ്ടപ്പെട്ട അഞ്ച് പേരിൽ ഒരാളാണ് ക്യാപ്റ്റൻ ശാംഭവി പഥക്. മുംബൈയിൽ നിന്ന് അജിത് പവാറുമായി പറന്ന വിമാനം പൂനെയിലെ ബാരാമതിക്ക് സമീപം ലാൻഡിങിന് മിനിറ്റുകൾക്ക് മുമ്പ് തകർന്നു വീഴുകയായിരുന്നു. മഹാരാഷ്ട്ര ഉപമുഖ്യമന്ത്രി അജിത് പവാർ, അദ്ദേഹത്തിന്റെ പേഴ്‌സണൽ സെക്യൂരിറ്റി ഓഫീസർ വിധിത് ജാദവ്, വിമാനത്തിലുണ്ടായിരുന്ന രണ്ട് പൈലറ്റുമാർ എന്നിവരുൾപ്പെടെ അഞ്ച് പേരും ഈ ദാരുണമായ അപകടത്തിൽ കൊല്ലപ്പെട്ടു.

ക്യാപ്റ്റൻ സുമിത് കപൂറും ക്യാപ്റ്റൻ ശാംഭവി പഥക്കുമായിരുന്നു വിമാനം നിയന്ത്രിച്ചിരുന്ന പൈലറ്റുമാരെന്ന് വിഎസ്ആർ ഏവിയേഷൻ സ്ഥിരീകരിച്ചു. ഇന്ന് രാവിലെ തകർന്ന ബോംബാർഡിയർ എയ്റോസ്പേസിന്റെ ലിയർജെറ്റ് 45 എന്ന മിഡ്-സൈസ് ബിസിനസ് ജെറ്റ് വിമാനത്തിലെ ഫസ്റ്റ് ഓഫീസറായിരുന്നു ക്യാപ്റ്റൻ ശാംഭവി പഥക്. വിഎസ്ആർ വെഞ്ചേഴ്‌സ് എന്ന സ്വകാര്യ കമ്പനിയുടേതായിരുന്നു ഈ വിമാനം. ഇതേ കമ്പനിയുടെ മറ്റൊരു വിമാനം 2023-ലും സമാനമായ അപകടത്തിൽപ്പെട്ടിരുന്നു.

ശാംഭവി പഥക്കിന്റെ ലിങ്ക്ഡ്ഇൻ പ്രൊഫൈൽ പ്രകാരം, 2018-നും 2019-നും ഇടയിൽ ന്യൂസിലാൻഡ് ഇന്റർനാഷണൽ കൊമേഴ്‌സ്യൽ പൈലറ്റ് അക്കാദമിയിൽ നിന്നാണ് അവർ പൈലറ്റ് പരിശീലനം നേടിയത്. മുംബൈ സർവകലാശാലയിൽ നിന്ന് എയറോനോട്ടിക്സ്/ഏവിയേഷൻ സയൻസ് ആൻഡ് ടെക്നോളജിയിൽ ബിഎസ്സി ബിരുദം നേടിയ അവർ ഡൽഹിയിലെ എയർഫോഴ്‌സ് ബാൽ ഭാരതി സ്‌കൂളിലായിരുന്നു സ്‌കൂൾ വിദ്യാഭ്യാസം പൂർത്തിയാക്കിയത്. കൂടാതെ, ഡയറക്ടറേറ്റ് ജനറൽ ഓഫ് സിവിൽ ഏവിയേഷനിൽ നിന്ന് ഫ്രോസൺ എയർലൈൻ ട്രാൻസ്‌പോർട്ട് പൈലറ്റ് ലൈസൻസും (ATPL) അവർ നേടിയിരുന്നു.

തന്റെ കരിയറിൽ നിരവധി ലൈസൻസുകളും സർട്ടിഫിക്കറ്റുകളും ക്യാപ്റ്റൻ ശാംഭവി സ്വന്തമാക്കിയിരുന്നു. 2022 മാർച്ചിൽ സ്‌പൈസ് ജെറ്റ് ലിമിറ്റഡിൽ നിന്ന് ഏവിയേഷൻ സെക്യൂരിറ്റി (AVSEC) സർട്ടിഫിക്കേഷനും, അതേ വർഷം ഫെബ്രുവരിയിൽ ജോർദാൻ എയർലൈൻ ട്രെയിനിംഗ് ആൻഡ് സിമുലേഷനിൽ നിന്ന് ജെറ്റ് ഓറിയന്റേഷൻ ട്രെയിനിംഗും (A320) അവർ പൂർത്തിയാക്കി. 2019 നവംബറിൽ ന്യൂസിലാൻഡ് സിവിൽ ഏവിയേഷൻ അതോറിറ്റിയിൽ നിന്നുള്ള കൊമേഴ്‌സ്യൽ പൈലറ്റ് ലൈസൻസും, അതേ വർഷം ജനുവരിയിൽ ഇന്റർനാഷണൽ സിവിൽ ഏവിയേഷൻ ഓർഗനൈസേഷനിൽ (ICAO) നിന്നുള്ള ഇംഗ്ലീഷ് ഭാഷാ പ്രാവീണ്യ ലെവൽ 6 സർട്ടിഫിക്കറ്റും അവർ കരസ്ഥമാക്കിയിരുന്നു.

മധ്യപ്രദേശ് ഫ്‌ലൈയിംഗ് ക്ലബ് ലിമിറ്റഡിൽ നിന്നുള്ള ഫ്‌ലൈറ്റ് ഇൻസ്ട്രക്ടർ റേറ്റിംഗും അവർക്ക് ഉണ്ടായിരുന്നു. ലിങ്ക്ഡ്ഇൻ പ്രൊഫൈൽ നൽകുന്ന വിവരം അനുസരിച്ച്, ഡിജിസിഎ നൽകിയ അവരുടെ കൊമേഴ്‌സ്യൽ പൈലറ്റ് ലൈസൻസിന്റെ കാലാവധി 2025 മെയ് മാസത്തിൽ അവസാനിച്ചിരുന്നു.