'അര്ഹതയുള്ളവരെ തഴഞ്ഞു, സമീറിനെ സ്ഥാനാര്ഥിയാക്കിയത് ഒരു കമ്മിറ്റിയും ആവശ്യപ്പെടാതെ'; തിരൂരങ്ങാടിയിലെ ലീഗ് സ്ഥാനാര്ഥി നിര്ണയത്തിനെതിരെ അബ്ദുറഹ്മാന് രണ്ടത്താണി
|സ്ഥാനാർഥി നിർണയത്തിനെതിരെ വനിതാ ലീഗും രംഗത്തെത്തിയിരുന്നു
മലപ്പുറം: പി.എം.എ സമീറിനെ തിരൂരങ്ങാടിയില് ലീഗ് സ്ഥാനാര്ഥിയാക്കിയതിനെതിരെ അബ്ദുറഹ്മാന് രണ്ടത്താണി. ഒരു കമ്മിറ്റിയും ആവശ്യപ്പെടാതെയാണ് സമീറിനെ സ്ഥാനാര്ഥിയാക്കിയതെന്ന് അബ്ദുറഹ്മാന് പറഞ്ഞു. അര്ഹതയുള്ളവരെ തഴഞ്ഞുവെന്നും ഇതിന്റെ മാനദണ്ഡം ചോദ്യം ചെയ്താല് അച്ചടക്കലംഘനമായി കാണരുതെന്നും രണ്ടത്താണി ഫേസ്ബുക്കില് വിമര്ശിച്ചു. സ്ഥാനാര്ഥി നിര്ണയത്തിനെതിരെ വനിതാ ലീഗും രംഗത്തെത്തിയിരുന്നു.
പോസ്റ്റിന്റെ പൂര്ണരൂപം
'ഞാന് വിമര്ശിക്കപ്പെടേണ്ടവനല്ല എന്ന് ആരും ധരിക്കരുത്.മിമ്പറില് നിന്ന ഖലീഫയോട് പോലും ചോദ്യമുന്നയിച്ച ചരിത്രമുണ്ട്. യൂത്ത് ലീഗ് നേതാക്കളായ അഡ്വ.പി.കെ ഫിറോസ് അഡ്വ: ഫൈസല് ബാബു ടി.പി.അശ്രഫലി പി.കെ. നവാസ് തുടങ്ങിയ മലപ്പുറം ജില്ലയില് നിന്നുള്ള യുവ നേതാക്കള് സ്ഥാനാര്ത്ഥികളായത് അഭിമാനകരം തന്നെ. ഇടതുപക്ഷത്തോട് പോരടിച്ച് രണ്ട് തവണ എം എല് എ യാവുകയും രണ്ട് തവണ തോല്ക്കുകയും ചെയ്ത കെ എം ഷാജിക്ക് വേങ്ങരയില് അവസരം നല്കുകയും ചെയ്ത തീരുമാനവും ഉചിതം. പക്ഷെ എ കെ ആന്റണിയും അവുക്കാദര് കുട്ടി നഹസാഹിബും യു എ ബീരാന് സാഹിബും പ്രതിനിധീകരിച്ച തിരൂരങ്ങാടി നിയോജക മണ്ഡലത്തില് നിന്ന് ഒരു പഞ്ചായത്ത് മുസ്ലിം ലീഗ് കമ്മിറ്റിയോ മുനിസിപ്പല് കമ്മിറ്റിയോ പാര്ട്ടി പ്രവര്ത്തകരോ ആവശ്യപ്പെടാതെ സമീപകാലത്ത് പ്രത്യക്ഷപ്പെട്ട പി.എം.എ സമീര് എന്നൊരാളെ അര്ഹതപ്പെട്ടവരുണ്ടായിട്ടും അവരെ അവഗണിച്ച് നിഷ്കളങ്കരായ തങ്ങന്മാരെ കരുവാക്കി ചിലരുടെ താല്പര്യത്തിനായി സ്ഥാനാര്ത്ഥിയാക്കിയതിന്റെ മാനദണ്ഡം പാര്ട്ടിയെ സ്നേഹിക്കുന്നവര് ചോദ്യം ചെയ്താല് അത് അച്ചടക്ക ലംഘനമായി കാണരുത്. പ്രതിഫലം പറ്റാതെ പാര്ട്ടിക്ക് വേണ്ടി കഠിനാധ്വാനം ചെയ്യുന്നവര് അവരുടെ വികാരം പ്രകടിപ്പിക്കുന്നത് സ്വാഭാവികമാണ്.'