എറണാകുളം മഹാരാജാസ് കോളജ് ഗ്രൗണ്ട് സിന്തറ്റിക് ട്രാക്കിലെ ബീഡിങ്ങുകളും, ഫ്ലഡ്ലൈറ്റുകളും മോഷണം പോയി

എറണാകുളം: എറണാകുളം മഹാരാജാസ് കോളജ് ഗ്രൗണ്ട് സിന്തറ്റിക് ട്രാക്കിലെ ബീഡിങ്ങുകളും, ഫ്ലഡ്ലൈറ്റുകളും മോഷണം പോയി. രണ്ടര ലക്ഷം രൂപയുടെ സാധനങ്ങളാണ് മോഷണം പോയത്. സംഭവത്തിൽ എറണാകുളം സെൻട്രൽ പോലീസ് കേസെടുത്തു.

വലിയ സുരക്ഷാ വീഴ്ചയാണ് മഹാരാജാസ് സ്കൂൾ ഗ്രൗണ്ടിൽ ഉണ്ടായിരിക്കുന്നത്. 29 സിന്തറ്റിക് ട്രാക്ക് ബീഡിങ്ങുകളും 30ലധികം ഫ്ലഡ്ലൈറ്റുകളുമാണ് മോഷണം പോയിരിക്കുന്നത്.

കഴിഞ്ഞ മാസവും സമാനമായ രീതിയിൽ മോഷണം നടന്നിരുന്നെങ്കിലും കാര്യമായി അന്വേഷിക്കുകയോ നടപടിയെടുക്കുകയോ ചെയ്തിട്ടില്ല. കൃത്യമായി ആസൂത്രണം നടത്തി മോഷ്ടിച്ചു എന്ന നിഗമനത്തിലാണ് ഇപ്പോൾ പൊലീസ്. മൂന്ന് സെക്യൂരിറ്റിമാരുണ്ടായിരുന്ന ഇവിടെ പകൽ സമയം ഒരാൾ മാത്രമാണ് ഇപ്പോഴുള്ളത്.

കേരള സ്കൂൾ ഗെയിംസിനായി ഗ്രൗണ്ട് നവീകരിച്ചിരുന്നു. അതിനുശേഷം ബീഡിങ്ങുകൾ ഉൾപ്പെടെ ഇളക്കിമാറ്റി ഗ്രൗണ്ടിൽ തന്നെയാണ് സൂക്ഷിച്ചിരുന്നത്. ഇത്തരത്തിൽ സൂക്ഷിച്ച വസ്തുക്കളാണ് മോഷണം പോയിരിക്കുന്നത്.