ഇന്ഡോര് പരിപാടികളില് 75 പേര്ക്ക് മാത്രം അനുമതി, ഓട്ട്ഡോര് ചടങ്ങില് 150; സംസ്ഥാനത്ത് ആള്ക്കൂട്ട നിയന്ത്രണം
|മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന കോവിഡ് അവലോകന യോഗത്തിലാണ് തീരുമാനം
ഒമിക്രോണ് വ്യാപന സാഹചര്യത്തില് കല്യാണം, മരണാനന്തര ചടങ്ങുകള്, മറ്റു സാമൂഹ്യ രാഷ്ട്രീയ സാംസ്കാരിക, സാമുദായിക പൊതുപരിപാടികള് എന്നിവക്ക് അടച്ചിട്ട മുറികളില് 75 പേരും തുറസ്സായ സ്ഥലങ്ങളില് 150 പേരുമായി പരിമിതപ്പെടുത്താന് മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന കോവിഡ് അവലോകന യോഗത്തില് തീരുമാനിച്ചു.
രാത്രികാല നിയന്ത്രണം ഉണ്ടാവില്ല. എല്ലാ രാജ്യങ്ങളില് നിന്നും വരുന്ന രോഗ ലക്ഷണമുള്ളവരുടെ പരിശോധന എയര്പോര്ട്ടുകളില് ശക്തിപ്പെടുത്തണം. ഇതുവരെ കോവിഡ് മരണ ധനസഹായത്തിന് അപേക്ഷിക്കാത്തവര് ഉടന് തന്നെ അപേക്ഷിക്കണം. കയ്യില് കിട്ടിയ അപേക്ഷകളില് നടപടി താമസിപ്പിക്കരുതെന്ന് മുഖ്യമന്ത്രി ഉദ്യോഗസ്ഥരോട് നിര്ദേശിച്ചു.
നിലവില് സംസ്ഥാനത്ത് 181 ഒമിക്രോണ് ബാധിതരാണ് ഉള്ളത്. 80 ശതമാനം പേരും രണ്ടാം ഡോസ് വാക്സിന് സ്വീകരിച്ചു. 15.43 ലക്ഷം കുട്ടികളാണ് വാക്സിന് ലഭിക്കാന് അര്ഹരായിട്ടുള്ളവര്. ഇതില് 2 ശതമാനം കുട്ടികള് വാക്സിന് സ്വീകരിച്ചു. കുട്ടികള്ക്ക് വാക്സിന് നല്കാനാവശ്യമായ നടപടികള് പുരോഗമിക്കുകയാണ്. ഒമിക്രോണ് വ്യാപന സാഹചര്യത്തില് വീടുകളില് കോവിഡ് ചികിത്സയില് കഴിയുന്നവര്ക്കുള്ള ചികിത്സാ പ്രോട്ടോക്കോള് ഉടന് ആരോഗ്യവകുപ്പ് പുറത്തിറക്കും.