പുതിയ പിആർ തന്ത്രവുമായി സർക്കാർ; ജീവനക്കാരുടെ മൊബൈൽ നമ്പറിലേക്ക് മുഖ്യമന്ത്രിയുടെ സന്ദേശം

തിരുവനന്തപുരം: പുതിയ പിആർ തന്ത്രവുമായി സംസ്ഥാന സർക്കാർ. സർക്കാർ ജീവനക്കാരുടെ മൊബൈലിലേക്കാണ് മുഖ്യമന്ത്രിയുടെ പേരിൽ സന്ദേശം വരുന്നത്. ഡിഎ കുടിശ്ശിക തീർത്തത് ഓർമ്മിപ്പിച്ചാണ് ജീവനക്കാർക്ക് സന്ദേശം ലഭിക്കുന്നത്. സർക്കാറിന്റെ കരുതൽ തുടരും എന്നും സന്ദേശത്തിലുണ്ട്.

ഓരോ ജീവനക്കാരന്റേയും പേരെടുത്ത് പറഞ്ഞ് അഭിസംബോധന ചെയ്താണ് സന്ദേശം. കഴിഞ്ഞ ബജറ്റിലെ ഓരോ പ്രഖ്യാപനങ്ങൾ നടപ്പാക്കുകയാണ്. ജീവനക്കാർക്കും പെൻഷൻകാർക്കും ഡിഎ,ഡിആർ സർക്കാർ പൂർണമായും അനുവദിച്ചിരിക്കുന്നു. സർക്കാർ ജീവനക്കാരുടെ ഭവന നിർമ്മാണ അഡ്വാൻസ് പുനഃസ്ഥാപിച്ച കാര്യവും സന്ദേശത്തിൽ ഓർമിപ്പിക്കുന്നുണ്ട്. ജീവനക്കാരുടെ ക്ഷേമവും അവകാശങ്ങളും സംരക്ഷിക്കാൻ ഈ സർക്കാർ എന്നും ഒപ്പമുണ്ട് എന്ന് പറഞ്ഞാണ് സന്ദേശം അവസാനിപ്പിക്കുന്നത്.