അതിഥി അധ്യാപക നിയമനം: വിരമിച്ച അധ്യാപകരെ പരിഗണിക്കാമെന്ന ഉത്തരവ് പിൻവലിച്ചു

തിരുവനന്തപുരം: സർക്കാർ എയ്ഡഡ് കോളേജുകളിലെ അതിഥി അധ്യാപക നിയമനവുമായി ബന്ധപ്പെട്ട് ഉന്നത വിദ്യാഭ്യാസ വകുപ്പ് ഇറക്കിയ ഉത്തരവ് പിൻവലിച്ചു. 70 വയസ് വരെയുള്ള വിരമിച്ച അധ്യാപകരെ നിയമനത്തിന് പരിഗണിക്കാമെന്ന ഉത്തരവാണ് പിൻവലിച്ചത്. പരാമർശത്തിനെതിരെ ഡി.വൈ.എഫ്.ഐ അടക്കമുള്ള യുവജന -വിദ്യാർഥി സംഘടനകൾ രംഗത്ത് വന്നിരുന്നു. തൊഴിലില്ലായ്മ രൂക്ഷമായ ഘട്ടത്തിലെ തീരുമാനം യുവജനവിരുദ്ധമാണെന്ന് അധ്യാപകരും പറഞ്ഞു.

കോളേജുകളിലെ അതിഥി അധ്യാപക നിയമനം, യോഗ്യതകൾ, തെരഞ്ഞെടുപ്പ് രീതി എന്നിവ ഉൾപ്പെടുത്തി പുറത്തിറക്കിയ മാർഗനിർദേശങ്ങൾ അടങ്ങിയ ഭാഗമാണ് പിൻവലിച്ചത്. 70 വയസ്സുവരെയുള്ള വിരമിച്ച അധ്യാപകരെയും നിയമനത്തിനായി പരിഗണിക്കാമെന്ന് ഈ മാസം ഒൻപതിന് പുറത്തിറക്കിയ ഉത്തരവിൽ പറ‍ഞ്ഞത്.

ഉത്തരവിനു പിന്നാലെ വിവിധ കോണിൽ നിന്നും പ്രതിഷേധങ്ങളും ഉയർന്നിരുന്നു. നിർദേശങ്ങൾ യുവജനവിരുദ്ധമാണെന്ന് കാട്ടിയാണ് ഡി.വൈ.എഫ്.ഐ രംഗത്തുവന്നത്. വിരമിച്ചവർക്ക് വീണ്ടും നിയമനം നൽകുന്നത് തൊഴിൽരഹിതരായ ചെറുപ്പക്കാരെ ബാധിക്കുമെന്നായിരുന്നു ഡി.വൈ.എഫ്.ഐയുടെ പക്ഷം. പരിചയസമ്പന്നരായ അധ്യാപകർ വിദ്യാർഥികൾക്ക് മുതൽക്കൂട്ട് ആകുമെന്ന അഭിപ്രായമുണ്ടെങ്കിലും യുവാക്കളുടെ അവസരം നഷ്ടമാകുന്നത് അംഗീകരിക്കാൻ കഴിയില്ല എന്ന് അധ്യാപകസംഘടനകളും അറിയിച്ചു.