കെഎസ്യു പ്രതിഷേധത്തിനിടെ ആരോഗ്യമന്ത്രി വീണാ ജോർജിന് പരിക്ക്
|കണ്ണൂർ റെയിൽവെ സ്റ്റേഷനിലാണ് സംഭവം
കണ്ണൂര്: കെഎസ്യു പ്രതിഷേധത്തിനിടെ ആരോഗ്യമന്ത്രി വീണാ ജോര്ജിന് പരിക്ക്. മന്ത്രിയുടെ കഴുത്തിനാണ് പരിക്കേറ്റത്. കണ്ണൂര് റെയില്വെ സ്റ്റേഷനില് നടന്ന പ്രതിഷേധത്തിനിടെയാണ് സംഭവം. മന്ത്രിയെ കണ്ണൂര് ജില്ലാ ആശുപത്രിയിലേക്ക് മാറ്റി.
ഇന്ന് രാവിലെ മുതല് ആരോഗ്യമന്ത്രി കണ്ണൂരില് വിവിധ പരിപാടികളില് പങ്കെടുക്കാനെത്തിയിരുന്നു. മന്ത്രിക്കെതിരെ യൂത്ത് കോണ്ഗ്രസും യൂത്ത് ലീഗുമടക്കം വലിയ പ്രതിഷേധമാണ് നടത്തിയത്. തിരുവനന്തപുരത്തേക്ക് മടങ്ങാന് കണ്ണൂര് റെയില്വെ സ്റ്റേഷനില് മന്ത്രി എത്തിയപ്പോഴാണ് കെഎസ്യു പ്രവര്ത്തകര് കരിങ്കൊടി കാണിച്ചത്. പ്രതിഷേധക്കാരെ പൊലീസ് തടയുകയും ചെയ്തു.മന്ത്രി കടന്നുപോകുന്ന സമയത്ത് പ്രതിഷേധക്കാരും പൊലീസും തമ്മില് ഉന്തും തള്ളുമുണ്ടായി. എന്നാല് മൂന്നാമത്തെ പ്ലാറ്റ്ഫോമില് എത്തിയപ്പോള് കഴുത്തിന് വേദനയുണ്ടെന്ന് മന്ത്രി പറയുകയായിരുന്നു. ഈ സമയത്ത് റെയില്വെ സ്റ്റേഷനിലുണ്ടായിരുന്ന സ്പീക്കര് എ.എന് ഷംസീറെ ഇക്കാര്യം അറിയിക്കുകയും ചെയ്തു. സ്പീക്കറാണ് ആരോഗ്യമന്ത്രിയോട് ആശുപത്രിയില് ചികിത്സ തേടാന് നിര്ദേശം നല്കിയത്.