സംസ്ഥാനത്ത് വെള്ളിയാഴ്ച വരെ ശക്തമായ മഴയ്ക്ക് സാധ്യത

തിരുവനന്തപുരം: സംസ്ഥാനത്ത് വെള്ളിയാഴ്ച വരെ ശക്തമായ മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. കണ്ണൂർ,കാസർകോട് ഒഴികെ എല്ലാ ജില്ലകളിലും ഇന്ന് യെല്ലോ അലർട്ട് പ്രഖ്യാപിച്ചു. ഇന്ന് വടക്കൻ ആൻഡമാൻ കടലിനു മുകളിൽ ചക്രവാതചുഴി രൂപപ്പെട്ടേക്കും.

തെക്കുകിഴക്കൻ അറബിക്കടലിൽ കേരള തീരത്തിനു സമീപത്തു ചക്രവാതച്ചുഴി നിലനിൽക്കുന്നതും ബംഗാൾ ഉൾക്കടലിലെ ന്യൂനമർദ സാധ്യതയുമാണു മഴ ശക്തമാകാൻ കാരണം. ശക്തമായ കാറ്റുണ്ടാകുമെന്നും കാലാവസ്ഥാ നിരീക്ഷണ കേന്ദ്രം.

കനത്ത മഴയെതുടർന്ന് മണ്ണിടിഞ്ഞ് വീണ് തിരുവനന്തപുരം- ചെങ്കോട്ട ദേശീയ പാതയിൽ ഗതാഗതം തടസപ്പെട്ടു. ചുള്ളിമാനൂർ ഭാഗത്താണ് മണ്ണ് ഇടിഞ്ഞ് വീണത്. 20 അടി ഉയരത്തിലുള്ളമൺതിട്ട റോഡിലേക്ക് ഇടിഞ്ഞ് വീഴുകയായിരുന്നു.