കലാ രാജുവിനെ തട്ടിക്കൊണ്ടുപോയ കേസ്: സിപിഎം ബ്രാഞ്ച് സെക്രട്ടറി അടക്കം നാലുപേർ കസ്റ്റഡിയിൽ

എറണാകുളം: കൂത്താട്ടുകുളത്ത് വനിതാ കൗൺസിലറെ തട്ടിക്കൊണ്ടുപോയ സംഭവത്തിൽ സിപിഎം ബ്രാഞ്ച് സെക്രട്ടറിയടക്കം നാലുപേർ കസ്റ്റഡിയിൽ. ചെല്ലക്കപ്പടി ബ്രാഞ്ച് സെക്രട്ടറി അരുൺ വി. മോഹനനെയും സിപിഎം പ്രവർത്തകരായ ടോണി ബേബി, റിൻസ് വർഗീസ്, സജിത്ത് എബ്രഹാം എന്നിവരെയുമാണ് കൂത്താട്ടുകുളം പൊലീസ് കസ്റ്റഡിയിലെടുത്തത്.

ശനിയാഴ്ചയാണ് എൽഡിഎഫ് ഭരിക്കുന്ന കൂത്താട്ടുകുളം നഗരസഭയിൽ യുഡിഎഫ് നൽകിയ അവിശ്വാസപ്രമേയത്തിന്മേലുള്ള ചർച്ചയിൽ പങ്കെടുക്കാനെത്തിയ കൗൺസിലറെ സിപിഎം പ്രവർത്തകർ തട്ടിക്കൊണ്ടുപോയതായി ആരോപണം ഉയർന്നത്. സ്വന്തം പാര്‍ട്ടിക്കാരാണ് തന്നെ ആക്രമിക്കുകയും ആക്ഷേപിക്കുകയും ചെയ്തതെന്ന ആരോപണത്തില്‍ ഉറച്ച് നില്‍ക്കുകയാണ് കലാ രാജു. തന്നെ കോണ്‍ഗ്രസ് ഒളിപ്പിച്ചതാണെന്ന സിപിഎം ജില്ലാ സെക്രട്ടറിയുടെ ആരോപണം അടിസ്ഥാനരഹിതരമാണെന്നും കൊലവിളി മുദ്രാവാക്യം ഉയര്‍ത്തിയ പാര്‍ട്ടിയില്‍ തുടരണമോ എന്ന കാര്യം ആലോചിക്കുമെന്നും കലാ രാജു പ്രതികരിച്ചിരിന്നു.