കണ്ണൂരില്‍ ലോഡ്ജില്‍ യുവതിയെ മരിച്ച നിലയില്‍ കണ്ടെത്തിയ സംഭവം; കൊലപാതകമെന്ന് സ്ഥിരീകരിച്ച് പൊലീസ്

കണ്ണൂര്‍: കണ്ണൂർ പറശ്ശിനിക്കടവിൽ ലോഡ്ജിൽ മരിച്ച നിലയിൽ യുവതിയെ കണ്ടെത്തിയ സംഭവം കൊലപാതകമെന്ന് പൊലീസ്. കണ്ണപുരം അയ്യോത്ത് സ്വദേശി കെ.വി സീമയെ സുഹൃത്ത് വിജയന്‍ കഴുത്തില്‍ ഷാള്‍ മുറുക്കി കൊലപ്പെടുത്തുകയായിരുന്നുവെന്ന് പൊലീസ് പറഞ്ഞു. പോസ്റ്റ്മോര്‍ട്ടത്തില്‍ സീമയുടെ കഴുത്ത് ഞെരിച്ചതിന്റെ ലക്ഷണങ്ങള്‍ കണ്ടെത്തിയിരുന്നു. സാമ്പത്തിക ഇടപാടാണ് കൊലക്ക് കാരണമെന്നാണ് പ്രാഥമിക നിഗമനം.

സീമയെ കൊലപ്പെടുത്തിയ ശേഷം ലോഡ്ജില്‍ നിന്ന് കടന്നുകളഞ്ഞ വിജയനെ മാട്ടൂലില്‍ തൂങ്ങിമരിച്ച നിലയില്‍ കണ്ടെത്തിയിരുന്നു. അയല്‍വാസികളായ ഇരുവരും ഇന്നലെ ഉച്ചയോടെയാണ് പറശ്ശിനിക്കടവിലെ ലോഡ്ജില്‍ മുറിയെടുത്തത്.

ചെറുകുന്ന് അയ്യോത്ത് സ്വദേശിയാണ് വിജയന്‍. ഇയാളുടെ മൃതദേഹം പോസ്റ്റ്‌മോര്‍ട്ടത്തിനായി പരിയാരം മെഡിക്കല്‍ കോളജിലേക്ക് മാറ്റി.