ശവ്വാല് പിറ തെളിഞ്ഞു; കേരളത്തില് ചെറിയ പെരുന്നാള് വെള്ളിയാഴ്ച
|പരപ്പനങ്ങാടിക്ക് സമീപം ചെട്ടിപ്പടിയിലാണ് മാസപ്പിറവി കണ്ടത്
കോഴിക്കോട്: ശവ്വാല് മാസപ്പിറവി ദൃശ്യമായതിനാല് വെള്ളിയാഴ്ച ചെറിയ പെരുന്നാള് ആയിരിക്കുമെന്ന് ഖാദിമാരായ പാണക്കാട് സാദിഖലി ശിഹാബ് തങ്ങള്, സയ്യിദ് ജിഫ്രി മുത്തുകോയ തങ്ങള്, കാന്തപുരം എ.പി അബൂബക്കര് മുസ്ലിയാര്, സയ്യിദ് ഇബ്രാഹീം ഖലീലുല് ബുഖാരി, സയ്യിദ് മുഹമ്മദ് കോയ തങ്ങള് ജമലുല്ലൈലി, സയ്യിദ് അബ്ദുല് നാസര്ഹയ്യ് ശിഹാബ് തങ്ങള് പാണക്കാട് തുടങ്ങിയവര് അറിയിച്ചു. പരപ്പനങ്ങാടിക്ക് സമീപം ചെട്ടിപ്പടിയിലാണ് മാസപ്പിറവി കണ്ടത്.
പെരുന്നാള് സാമൂഹ്യപരമായ ഒരു വിപ്ലവമാണെന്നും ആരും പട്ടിണി കിടക്കാന് പാടില്ലെന്നും പാണക്കാട് സാദിഖലി ശിഹാബ് തങ്ങള് പറഞ്ഞു. ഫിത്വര് സക്കാത്ത് കൊടുത്തുകൊണ്ട് എല്ലാവരിലേക്കും സുഭിക്ഷത ഉറപ്പുവരുത്താനുള്ള മഹത്തായ നിര്ദ്ദേശമാണ് ഇസ്ലാം നല്കിയിട്ടുള്ളത്. ആഘോഷത്തില് പങ്കുചേരാന് കഴിയാതെ യുദ്ധത്തിന്റെയും ഏറ്റുമുട്ടലിന്റെയും വഴിയിലൂടെ കടന്നുപോകുന്ന രാജ്യങ്ങളുണ്ട്. അവര്ക്ക് സമാധാനത്തിനു വേണ്ടി പ്രാര്ഥിക്കുന്നു. ആ സമൂഹത്തോട് ഐക്യദാര്ഢ്യം പ്രഖ്യാപിക്കുന്നു. പെരുന്നാള് ദിനം പ്രാര്ഥനാ ദിനമായി കൂടി ആചരിക്കണമെന്നും അദ്ദേഹം പറഞ്ഞു.
പശ്ചിമേഷ്യയിലെ യുദ്ധസാഹചര്യത്തില് ഇന്ധനക്ഷാമം അടക്കം നേരിടുകയാണെന്നും പ്രവാസികളടക്കം വലിയ പ്രയാസത്തിലാണെന്നും വിശ്വാസത്തിലൂന്നിയാവണം ആഘോഷമെന്നും സയ്യിദ് മുഹമ്മദ് കോയ തങ്ങള് ജമലുല്ലൈലി പറഞ്ഞു. എല്ലാവര്ക്കും നന്മ ചെയ്യാനാവണം. എല്ലാ പള്ളികളിലും ലോക സമാധാനത്തിനുള്ള പ്രാര്ഥനക്ക് ആഹ്വാനം ചെയ്തിട്ടുണ്ടെന്നും അദ്ദേഹം പറഞ്ഞു.