മന്ത്രി വീണാ ജോര്ജിനെ കരിങ്കൊടി കാണിച്ച കെഎസ്യു പ്രവര്ത്തകര്ക്ക് ജാമ്യം
|തലശ്ശേരി ജില്ലാ സെഷൻസ് കോടതിയാണ് ജില്ലാ പ്രസിഡന്റ് എം.സി അതുൽ ഉൾപ്പെടെ അഞ്ച് പേർക്ക് ജാമ്യം അനുവദിച്ചത്
കണ്ണൂര്: കണ്ണൂരില് ആരോഗ്യമന്ത്രി വീണാ ജോര്ജിനെ ആക്രമിച്ചെന്ന കേസില് കെഎസ്യു പ്രവര്ത്തകര്ക്ക് ജാമ്യം. തലശ്ശേരി ജില്ലാ സെഷന്സ് കോടതിയാണ് ജില്ലാ പ്രസിഡന്റ് എം.സി അതുല് ഉള്പ്പെടെ അഞ്ച് പേര്ക്ക് ജാമ്യം നല്കിയത്. കേസില് കഴിഞ്ഞ ദിവസം കോടതി വിശദമായ വാദം കേട്ടിരുന്നു.
പ്രതികള് മാരകായുധം ഉപയോഗിച്ച് മന്ത്രിയെ ആക്രമിക്കാൻ ശ്രമിച്ചുവെന്നായിരുന്നു പ്രോസിക്യൂഷന് വാദം. എന്നാല്, ആയുധം കണ്ടെത്താന് പ്രോസിക്യൂഷന് സാധിച്ചില്ലെന്നും അത്തരമൊരു ആക്രമണശ്രമം അവിടെ നടന്നില്ലെന്നും പ്രതിഭാഗം വാദിക്കുകയും ചെയ്തു. തുടര്ന്ന് കേസില് നിര്ണായക തെളിവുകള് കണ്ടെത്താന് ആയില്ലെന്ന് ചൂണ്ടിക്കാട്ടിയാണ് കോടതിയുടെ ജാമ്യ ഉത്തരവ്.
കര്ശന ഉപാധികളോടെയാണ് കോടതി ജാമ്യം അനുവദിച്ചിരിക്കുന്നത്. എല്ലാ തിങ്കളാഴ്ചയും അന്വേഷണ ഉദ്യോഗസ്ഥരുടെ മുന്പില് ഹാജരാകണമെന്നും ജാമ്യകാലയളവില് മറ്റ് കുറ്റകൃത്യങ്ങളില് ഉള്പ്പെടരുതെന്നും കോടതി ഉത്തരവിലുണ്ട്. അമ്പതിനായിരം രൂപയുടെ രണ്ട് ആള് ജാമ്യത്തിലാണ് അഞ്ചുപേരെയും വിട്ടയച്ചത്.
പ്രതിഷേധത്തിനിടെ പ്രവര്ത്തകര് ആയുധം പ്രയോഗിച്ച് ആരോഗ്യമന്ത്രിയെ ആക്രമിച്ചുവെന്ന ഗണ്മാന്റെ മൊഴിയുടെ അടിസ്ഥാനത്തിലാണ് അഞ്ച് കെഎസ്യു പ്രവര്ത്തകര്ക്കെതിരെ കേസെടുത്തിരുന്നത്. 'കൊല്ലടാ എന്നെ' എന്ന് പ്രവര്ത്തകര് ആക്രോഷിച്ചെന്നും ആയുധം ഉപയോഗിച്ച് മന്ത്രിക്ക് നേരെ ചാടിവീണ് കഴുത്തിന് ആക്രമിച്ചുവെന്നും പൊലീസ് എഫ്ഐആര് രേഖപ്പെടുത്തുകയും ചെയ്തു. കെഎസ്യു ജില്ലാ പ്രസിഡന്റ് എം.സി അതുല്, വി.വി അക്ഷയ്, ബിതുല് ബാലന്, സി.എച്ച് മുബാസ്, അഹമ്മദ് യാസീന് എന്നിവരെയാണ് പ്രതിഷേധത്തിനിടെ പൊലീസ് അറസ്റ്റ് ചെയ്തിരുന്നത്.