മസാലബോണ്ട്; ഇഡി നോട്ടീസ് റദ്ദ് ചെയ്യണമെന്നാവശ്യപ്പെട്ട് മുഖ്യമന്ത്രി ഹൈക്കോടതിയിൽ

കൊച്ചി: മസാലബോണ്ടിലെ ഇഡി നോട്ടീസ് റദ്ദ് ചെയ്യണമെന്നാവശ്യപ്പെട്ട് മുഖ്യമന്ത്രി ഹൈക്കോടതിയെ സമീപിച്ചു. കഴിഞ്ഞ ദിവസം കിഫ്ബി സമർപ്പിച്ച ഹരജിയിൽ തുടർനടപടി മരവിപ്പിച്ച് കൊണ്ട് ഹൈക്കോടതി ഇടക്കാല ഉത്തരവ് ഇറക്കിയിരുന്നു. അതിന് പിന്നാലെയാണ് ഇഡി നോട്ടീസ് റദ്ദ് ചെയ്യണം എന്നാവശ്യപ്പെട്ട് മുഖ്യമന്ത്രി ഹൈക്കോടതിയെ സമീപിച്ചത്. കിഫ്ബി മസാല ബോണ്ട് വഴി സമാഹരിച്ച പണം ഭൂമി വാങ്ങാൻ ഉപയോഗിച്ചത് ഫെമ ചട്ടലംഘനമാണ് എന്ന് കാണിച്ചാണ് മുഖ്യമന്ത്രി, മുൻ ധനമന്ത്രി തോമസ് ഐസക്ക്, കിഫ്ബി കെ.എം.എബ്രഹാം എന്നിവർക്ക് ഇഡി നോട്ടീസ് അയച്ചത്. മസാലബോണ്ടിലൂടെ സമാഹരിച്ച പണം ഉപയോഗിച്ച് സ്ഥലം വാങ്ങുകയല്ല, വികസന പ്രവർത്തനങ്ങൾക്കുള്ള സ്ഥലം ഏറ്റെടുക്കുകയാണ് ചെയ്തത് എന്നാണ് സർക്കാർ നിലപാട്.