Photo|Special Arrangement
മൂന്ന് സംസ്ഥാനങ്ങളിൽ കുട്ടികളുടെ മരണം: കോൾഡ്റിഫ് കഫ് സിറപ്പിന്റെ വില്പ്പന കേരളത്തില് നിര്ത്തിവച്ചു; പരിശോധന ശക്തം
|സംസ്ഥാനത്ത് ഡ്രഗ്സ് കണ്ട്രോള് വകുപ്പിന്റെ നേതൃത്വത്തില് ശക്തമായ പരിശോധനകള് തുടരുകയാണ്.
മൂന്ന് സംസ്ഥാനങ്ങളിൽ കുട്ടികൾ മരിച്ച സാഹചര്യത്തിൽ കേരളത്തില് കോൾഡ്റിഫ് സിറപ്പിന്റെ വില്പ്പന സംസ്ഥാന ഡ്രഗ്സ് കണ്ട്രോള് വകുപ്പ് നിര്ത്തിവയ്പ്പിച്ചു. കോൾഡ്റിഫ് സിറപ്പിന്റെ എസ്ആര് 13 ബാച്ചില് പ്രശ്നം കണ്ടെത്തിയെന്ന് കേരളത്തിന് പുറത്തുനിന്നുള്ള റിപ്പോര്ട്ടുകളെ തുടര്ന്നാണ് നടപടിയെന്ന് ആരോഗ്യമന്ത്രി വീണാ ജോര്ജ് അറിയിച്ചു. ഈ ബാച്ച് മരുന്നിന്റെ വില്പ്പന കേരളത്തില് നടത്തിയിട്ടില്ലെന്നാണ് സംസ്ഥാന ഡ്രഗ്സ് കണ്ട്രോള് വകുപ്പിന്റെ പ്രാഥമിക അന്വേഷണത്തില് മനസിലായത്.
എങ്കിലും സുരക്ഷയെ കരുതിയാണ് മരുന്നിന്റെ വിതരണവും വില്പനയും പൂര്ണമായും നിര്ത്തിവയ്ക്കാന് ഡ്രഗ്സ് കണ്ട്രോളര് ഡ്രഗ്സ് ഇന്സ്പെക്ടര്മാര്ക്ക് നിര്ദേശം നല്കിയത്. കേരളത്തില് എട്ട് വിതരണക്കാര് വഴിയാണ് ഈ മരുന്നിന്റെ വില്പ്പന നടത്തുന്നത്. ഈ കേന്ദ്രങ്ങളിലെല്ലാം തന്നെ വിതരണവും വിൽപ്പനയും നിര്ത്തിവയ്ക്കാന് നിര്ദേശം നല്കിയിട്ടുണ്ട്. കൂടാതെ മെഡിക്കല് സ്റ്റോറുകള് വഴിയുള്ള വില്പ്പനയും നിര്ത്തിവയ്ക്കാന് നിര്ദേശം നല്കിയിട്ടുണ്ടെന്നും മന്ത്രി പറഞ്ഞു.
സംസ്ഥാനത്ത് ഡ്രഗ്സ് കണ്ട്രോള് വകുപ്പിന്റെ നേതൃത്വത്തില് ശക്തമായ പരിശോധനകള് തുടരുകയാണ്. കോൾഡ്റിഫ് സിറപ്പിന്റെ സാമ്പിളുകള് ശേഖരിച്ചിട്ടുണ്ട്. ഇതോടൊപ്പം മറ്റ് ചുമ മരുന്നുകളുടെയും സാമ്പിളുകള് ശേഖരിച്ചു വരുന്നു. കേരളത്തില് ചുമ മരുന്നുകള് നിര്മിക്കുന്ന അഞ്ച് കമ്പനികളുടെ മരുന്ന് സാമ്പിളുകള് ശേഖരിച്ച് പരിശോധന നടത്താനും നിര്ദേശം നല്കിയിട്ടുണ്ട്.
സെന്ട്രല് ഡിജിഎച്ച്സിന്റെ നിര്ദേശപ്രകാരം രണ്ട് വയസിന് താഴെയുള്ള കുട്ടികള്ക്ക് ഡോക്ടര്മാര് ചുമയ്ക്കുള്ള സിറപ്പ് പ്രിസ്ക്രൈബ് ചെയ്യരുത്. അഥവാ അത്തരത്തില് മരുന്ന് കുറിപ്പടി വന്നാലും ചുമയ്ക്കുള്ള സിറപ്പ് നല്കരുതെന്ന് എല്ലാ മെഡിക്കല് സ്റ്റോറുകള്ക്കും നിര്ദേശം നല്കിയിട്ടുണ്ട്. അഞ്ച് വയസിന് മുകളില് പ്രായമുള്ള കുട്ടികള്ക്ക് ചുമയ്ക്കുള്ള സിറപ്പ് നല്കുന്നെങ്കില് നിരീക്ഷണം ശക്തമാക്കാനും നിര്ദേശം നല്കിയിട്ടുണ്ട്.