'മുഖ്യമന്ത്രി ആർഎസ്എസിൻ്റെ ഏജൻ്റാണ്': വിമർശനവുമായി കെ. മുരളീധരൻ

തിരുവനന്തപുരം: മുഖ്യമന്ത്രി പിണറായി വിജയനെതിരെ രൂക്ഷവിമർശനവുമായി കോൺ​ഗ്രസ് നേതാവ് കെ. മുരളീധരൻ. മുഖ്യമന്ത്രി ആർഎസ്എസിൻ്റെ ഏജൻ്റാണെന്നും, എന്തിനാണ് ഒളിച്ചു കളിക്കുന്നതെന്നും മുരളീധരൻ പറഞ്ഞു. തൃശൂർ പൂരം കലക്കലിൽ ജുഡീഷ്യൽ അന്വേഷണം പ്രഖ്യാപിക്കും വരെയും കോൺഗ്രസ് സമരം ചെയ്യുമെന്നും മുരളീധരൻ കൂട്ടിച്ചേർത്തു.

'ഡിജിപിക്ക് സംസ്ഥാനത്തെ പറ്റി ഒന്നും അറിയില്ല. തലസ്ഥാനത്ത് ​ഗുണ്ടാസംഘങ്ങൾ അഴിഞ്ഞാടുമ്പോളും അജിത് കുമാർ വിലസുമ്പോളും മിണ്ടാതിരുന്നയാളാണ് ഡിജിപി. കാരണം മിണ്ടിയാൽ അദ്ദേഹത്തിൻ്റെ സ്ഥാനം തെറിക്കും.'- മുരളീധരൻ പറഞ്ഞു.

പിണറായിക്കെതിരെ നേരത്തെയും വിമർശനവുമായി മുരളീധരൻ രം​ഗത്തെത്തിയിരുന്നു. 'യോഗി ആദിത്യനാഥിനെക്കാൾ ആർഎസ്എസിന് വിശ്വാസം പിണറായി വിജയനെയാണ്. പൂരം കലക്കി സുരേഷ് ഗോപിയെ ഡൽഹിക്ക് അയച്ച പോലെ പൊങ്കാല കലക്കി തിരുവനന്തപുരം നഗരസഭ ബിജെപിക്ക് കൊടുക്കുമോ എന്നാണ് ഇനി അറിയേണ്ടത്. പൊലീസ് നൽകിയ റിപ്പോർട്ടിൽ സിപിഐക്ക് വിശ്വാസം ഉണ്ടോയെന്നും' മുരളീധരൻ പറഞ്ഞിരുന്നു.