വീട്ടിലെ വളർത്തു പൂച്ചയെ കാണാനില്ല; തൃശൂരിൽ മുത്തച്ഛനെ ചെറുമകൻ വെട്ടി പരിക്കേൽപ്പിച്ചു

തൃശൂർ: എടക്കുളത്ത് മുത്തച്ഛനെ ചെറുമകൻ വെട്ടി പരിക്കേൽപ്പിച്ചു. വീട്ടിലെ വളർത്തു പൂച്ചയെ കാണാത്തതിനെ ചൊല്ലിയുള്ള തർക്കമാണ് അക്രമണത്തിന് കാരണം. എടക്കുളം കോമ്പാത്ത് വീട്ടിൽ കേശവൻ (79 ) ആണ് പരിക്കേറ്റത്. ചെറുമകൻ ശ്രീകുമാറാണ് വെട്ടി പരിക്കേൽപ്പിച്ചത്.

കാലിനും കെെകൾക്കും പരിക്കേറ്റ കേശവനെ മെഡിക്കൽ കോളേജിൽ എത്തിച്ചു. ശ്രീകുമാർ തന്നെയാണ് മുത്തച്ഛനെ ഹോസ്പിറ്റലിൽ എത്തിച്ചത്. വിവരം അറിഞ്ഞെത്തിയ സ്‌പെഷ്യല്‍ ക്രൈംബ്രാഞ്ച് ഉദ്യോ​ഗസ്ഥൻ ശ്രീജിത്താണ് ഇയാളെ തടഞ്ഞു വെക്കുകയും പൊലീസിൽ വിവരമറിയിക്കുകയും ചെയ്തത്. തുടർന്ന് പൊലീസ് സ്ഥലത്തെത്തി ശ്രീകുമാറിനെ കസ്റ്റഡിയിൽ എടുത്തു.