തദ്ദേശ തെരഞ്ഞെടുപ്പ് തിരുവനന്തപുരം കോർപറേഷൻ ബിജെപി സ്ഥാനാർഥികളെ പ്രഖ്യാപിച്ചു

തിരുവനന്തപുരം: തിരുവനന്തപുരം കോർപറേഷനിൽ ആദ്യഘട്ട സ്ഥാനാർഥികളെ പ്രഖ്യാപിച്ച് ബിജെപി. മുൻ ഡിജിപി ആർ.ശ്രീലേഖയും വി.വി.രാജേഷും മേയർ സ്ഥാനാർഥികളാകും. കോൺഗ്രസിന്റെ മേയർ സ്ഥാനാർഥി ശബരീനാഥനെതിരെ സ്ഥാനാർഥിയെ പ്രഖ്യാപിച്ചില്ല. പാളയത്ത് മുൻ അത്‍ലറ്റ് പദ്മിനി മത്സരത്തിനിറങ്ങും.

കൊടുങ്ങാനൂരിൽ വി.വി രാജേഷും മുൻ ഡിജിപി ശാസ്തമം​ഗലം വാർഡിൽ നിന്നുമാണ് മത്സരിക്കുക. മേയർ സ്ഥാനാർഥികളാകാൻ ഇവർ രണ്ടുപേർക്കുമാണ് കൂടുതൽ സാധ്യതയെന്നാണ് പ്രാഥമിക നി​ഗമനം. കൂടാതെ, പാളയത്ത് മുൻ അത്‍ലറ്റ് പദ്മിനി ബിജെപിക്കുവേണ്ടി മത്സരിക്കും. തമ്പാനൂരിൽ മുൻ കോൺ​ഗ്രസ് നേതാവ് കൂടിയായ സതീഷ് കളത്തിലിറങ്ങും.

തിരുമല അനിലിന്റെ ആത്മഹത്യയെ തുടർന്നുണ്ടായ വിവാ​ദങ്ങൾ കാരണം ഏറെ പ്രതിസന്ധികൾക്കിടയായ തിരുമല വാർഡിൽ ദേവ് പി.എസ് മത്സരിക്കുമെന്നും ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ അറിയിച്ചു.

കോൺ​ഗ്രസ് പ്രഖ്യാപിച്ച മേയർ സ്ഥാനാർഥി ശബരീനാഥന്റെ എതിരാളിയാരാണെന്ന് ആദ്യഘട്ടത്തിൽ പ്രഖ്യാപിച്ചിട്ടില്ല. രണ്ടാംഘട്ടത്തിലായിരിക്കും പ്രഖ്യാപനമെന്നാണ് സൂചന.