കൂറ്റന്‍ യന്ത്രങ്ങളുമായി മൂന്ന് മാസത്തിലേറെയായി തടഞ്ഞിട്ട ട്രെയിലറുകൾ ഇന്ന് താമരശ്ശേരി ചുരം കയറും

കോഴിക്കോട്: കൂറ്റന്‍ യന്ത്രങ്ങളുമായി മൂന്ന് മാസത്തിലേറെയായി കോഴിക്കോട് അടിവാരത്ത് തടഞ്ഞിട്ടിരിക്കുന്ന ട്രെയിലറുകൾ ഇന്ന് രാത്രി താമരശ്ശേരി ചുരം കയറും. രാത്രി അടിവാരം മുതൽ ചുരം വഴി വയനാട് ജില്ലയിലേക്കും തിരിച്ചും വാഹനങ്ങൾക്ക് കർശന നിരോധനം ഏർപ്പെടുത്തിയിട്ടുണ്ട്.

ഇന്ന് രാത്രി എട്ട് മണി മുതലാണ് ചുരത്തിൽ ഗതാഗത നിയന്ത്രണം ആരംഭിക്കുക. 11 മണിയോടെ ട്രെയിലറുകൾ കടന്ന് പോകാൻ വാഹനങ്ങൾ പൂർണമായും തടയും. ഫയർഫോഴ്സ്, ഫോറസ്റ്റ് അധികൃതർ, കെ.എസ്.ഇ.ബി അധികൃതർ തുടങ്ങിയവർ ട്രെയിലറുകൾ കയറാൻ ആവശ്യമായ സഹായം ഒരുക്കും. അടിയന്തര സാഹചര്യങ്ങളിൽ മൂന്നാം വളവിലും അഞ്ചാം വളവിലും തകരപ്പാട്ടയിലും ട്രെയിലറുകൾ നിർത്തിയിടും.

കർണാടക നഞ്ചൻഗോഡിലെ നെസ്‌ലെ കമ്പനിയുടെ പ്ലാന്‍റിലേക്കുള്ള കൂറ്റൻ യന്ത്രങ്ങളുമായി സെപ്റ്റംബർ 10നാണ് ട്രെയിലറുകൾ അടിവാരത്തെത്തിയത്. ചുരംവഴി പോകുന്നത് ഗതാഗതതടസ്സമുണ്ടാക്കുമെന്നതിനാൽ ജില്ലാ ഭരണകൂടം യാത്രാനുമതി നിഷേധിക്കുകയായിരുന്നു. ചർച്ചകൾക്കൊടുവിൽ 3 മാസത്തിന് ശേഷമാണ് ട്രെയിലറുകൾ ചുരം കയറാനൊരുങ്ങുന്നത്. ജില്ലാഭരണകൂടം ആവശ്യപ്പെട്ടതുപ്രകാരമുള്ള സത്യവാങ്മൂലം 20 ലക്ഷം രൂപയുടെ ഡിമാൻഡ് ഡ്രാഫ്റ്റ് എന്നിവ നൽകിയതിന് ശേഷമാണ് യാത്രാനുമതി നൽകിയത്.