കേരള - ഡിജിറ്റൽ സർവകലാശാലകളിലെ താൽക്കാലിക വിസി നിയമനം ചോദ്യംചെയ്തുള്ള ഹരജിയിൽ വിധി ഇന്ന്
|ചാൻസലറുടെ നടപടി റദ്ദാക്കണമെന്ന് സർക്കാർ
കൊച്ചി: കേരള സാങ്കേതിക, ഡിജിറ്റല് സര്വകലാശാലകളിലെ താല്ക്കാലിക വിസി നിയമനം ചോദ്യം ചെയ്ത് നല്കിയ ഹരജികളില് ഹൈക്കോടതി ഇന്ന് വിധി പറയും. താല്ക്കാലിക വിസിമാരെ നിയമിച്ച ചാന്സലറുടെ നടപടി റദ്ദാക്കണമെന്ന് ആവശ്യപ്പെട്ട് സംസ്ഥാന സര്ക്കാര് നല്കിയ രണ്ട് ഹരജികളിലാണ് ജസ്റ്റിസ് പി.ഗോപിനാഥ് അധ്യക്ഷനായ സിംഗിള് ബെഞ്ച് വിധി പറയുക.
സര്ക്കാര് നല്കിയ പാനലിന് പുറത്തുനിന്നായിരുന്നു ചാന്സലറുടെ താല്ക്കാലിക വിസി നിയമനം. ഇത് സര്വകലാശാല നിയമങ്ങളുടെ ലംഘനമാണ് എന്നാണ് സര്ക്കാരിന്റെ വാദം. സാങ്കേതിക സര്വകലാശാലയിലേക്ക് ഡോ. കെ. ശിവപ്രസാദിനെയും ഡിജിറ്റല് സര്വകലാശാല വൈസ് ചാന്സലര് ആയി ഡോ. സിസ തോമസിനെയുമാണ് ചാന്ലസര് നിയമിച്ചത്. 2023 ലെ സിസ തോമസ് കേസിലെ ഹൈക്കോടതി ഡിവിഷന് ബെഞ്ചിന്റെ വിധി മറികടക്കുന്നതാണ് ചാന്സലറുടെ നടപടി എന്നും സര്ക്കാര് ഹൈക്കോടതിയെ അറിയിച്ചിരുന്നു.