ചിന്നസ്വാമിയില്‍ ബംഗളൂരുവിനെ തീര്‍ത്ത് പഞ്ചാബ്

ബംഗളൂരു: ചിന്നസ്വാമിയിലരങ്ങേറിയ ത്രില്ലറിൽ ബംഗളൂരുവിനെ തകർത്ത് പഞ്ചാബ്. അഞ്ച് വിക്കറ്റിനാണ് പഞ്ചാബിന്റെ ജയം. ബംഗളൂരു ഉയർത്തിയ 96 റൺസ് വിജയലക്ഷ്യം പഞ്ചാബ് 11 പന്ത് ബാക്കി നിൽക്കേ മറികടന്നു. അവസാന ഓവറുകളിൽ കളംനിറഞ്ഞ നെഹാൽ വധേരയാണ് പഞ്ചാബിന് മിന്നും ജയം സമ്മാനിച്ചത്.

മഴയെത്തുടർന്ന് 14 ഓവറാക്കി ചുരുക്കിയ മത്സരത്തിൽ ടോസ് നേടിയ പഞ്ചാബ് ബോളിങ് തെരഞ്ഞെടുക്കുകയായിരുന്നു. ശ്രേയസ് അയ്യരുടെ തീരുമാനം ശരിവക്കും വിധമായിരുന്നു പഞ്ചാബ് ബോളർമാരുടെ പ്രകടനം. അർഷദീപ് സിങ്ങും, യുസ്വേന്ദ്ര ചഹലും, മാർക്കോ യാൻസനും, ഹർപ്രീത് ബ്രാറും ചേർന്ന് ബംഗളൂരു ബാറ്റിങ് നിരയുടെ നട്ടെല്ലൊടിച്ചു. എട്ട് ബാറ്റർമാരാണ് ബംഗളൂരു നിരയിൽ രണ്ടക്കം കാണാതെ കൂടാരം കയറിയത്. അവസാന ഓവറുകളിൽ തകർത്തടിച്ച ടിം ഡേവിഡാണ് ബംഗളൂരുവിന് പൊരുതാവുന്ന സ്‌കോർ സമ്മാനിച്ചത്. ഡേവിഡ് 26 പന്തിൽ അർധ സെഞ്ച്വറി കുറിച്ചു.

മറുപടി ബാറ്റിങ്ങിൽ പഞ്ചാബ് തുടക്കത്തിൽ ഒന്ന് പതറിയെങ്കിലും അവസാന ഓവറുകളിൽ നെഹാൽ വധേര പഞ്ചാബിനെ ഒറ്റക്ക് തോളിലേറ്റി. 19 പന്തിൽ മൂന്ന് സിക്‌സും മൂന്ന് ഫോറും സഹിതം 33 റൺസുമായി വധേര പുറത്താവാതെ നിന്നു.