'ഇത് വ്യക്തിപരമായ ചൂതാട്ടമാണ്, മാറിനിൽക്കുന്നത് ഭയാനകമായിരുന്നു; രണ്ട് കോടി രൂപ ശമ്പളമുള്ള ജോലി രാജിവച്ച് യുവാവ്, പ്രശംസിച്ച് മാനേജർ, കാരണമിത്
|രാജിക്ക് പിന്നാലെ വലിയ അഭിനന്ദനമാണ് യുവാവിന് സോഷ്യൽ മീഡിയയിൽ നിന്ന് ലഭിച്ചത്
സുരക്ഷിതവും ഉയർന്ന ശമ്പളമുള്ളതുമായ ഒരു ജോലിയിൽ സ്വപ്നം കാണുന്നവരാണ് നമ്മൾ. അത് സാക്ഷാത്കരിക്കാൻ വേണ്ടി വളരെ ചുരുക്കം ചിലർ മാത്രമേ റിസ്ക് എടുക്കാൻ ധൈര്യപ്പെടാറുള്ളൂ. കഷ്ടപ്പെടാനും ലക്ഷ്യത്തിലേക്ക് എത്താനുമുള്ള മനസും ഇതിന് അത്യാവശ്യമാണ്. അടുത്തിടെ, മുൻ മൈക്രോസോഫ്റ്റ് സോഫ്റ്റ്വെയർ എഞ്ചിനീയറായ ജുനാദ് ഖാൻ, സ്വന്തം സ്റ്റാർട്ടപ്പിൽ പൂർണമായും ശ്രദ്ധ കേന്ദ്രീകരിക്കുന്നതിനായി, പ്രതിവർഷം ഏകദേശം 220,000 ഡോളർ (ഏകദേശം 2 കോടി രൂപ) ശമ്പളം ലഭിക്കുന്ന ജോലി ഉപേക്ഷിക്കാൻ തീരുമാനിച്ച വാർത്ത വലിയ ശ്രദ്ധനേടിയിരുന്നു. അദ്ദേഹത്തിന്റെ മാനേജരുടെ പ്രതികരണത്തിന് പിന്നാലെയാണ് ഇത് വൈറലായത്.
മൈക്രോസോഫ്റ്റ് വിടുക എന്നത് തനിക്ക് ലഭിച്ച മിക്ക ഉപദേശങ്ങൾക്കും വിരുദ്ധമായ ഒരു തീരുമാനമായിരുന്നുവെന്ന് ജുനാദ് ഖാൻ പങ്കുവെച്ചു. ആറു മാസം മുമ്പ്, എല്ലാവരും ചെയ്യരുതെന്ന് പറഞ്ഞ ഒരു കാര്യം താൻ ചെയ്തതായും ആ സമയത്ത് അത് ഭയപ്പെടുത്തുന്ന തീരുമാനമായിരുന്നെന്നും അദ്ദേഹം പറഞ്ഞു.
തന്റെ സ്റ്റാർട്ടപ്പിന് വിജയിക്കാനുള്ള ഏറ്റവും നല്ല അവസരം നൽകുന്നതിനായി നടത്തിയ ഒരു വ്യക്തിപരമായ ചൂതാട്ടമായിട്ടാണ് അദ്ദേഹം ഇതിനെ വിശേഷിപ്പിച്ചത്. “എനിക്കും എന്റെ സ്റ്റാർട്ടപ്പിനും വേണ്ടി ഞാൻ മൈക്രോസോഫ്റ്റിലെ $220K വിലയുള്ള വലിയ ടെക് ജോലി ഉപേക്ഷിക്കാൻ തീരുമാനിച്ചു, ആ നിമിഷം, എന്റെ സ്ഥിരതയുള്ളതും സുഖകരവുമായ ജോലിയിൽ നിന്ന് മാറിനിൽക്കുന്നത് തികച്ചും ഭയാനകമായിരുന്നു, പക്ഷേ അന്ന് അത് ചെയ്തില്ലെങ്കിൽ, എന്നെന്നേക്കുമായി ഖേദിക്കേണ്ടിവരുമെന്ന് എനിക്കറിയാമായിരുന്നു.” അദ്ദേഹം കുറിച്ചു.
വീഡിയോയിൽ, ഖാൻ തന്റെ മാനേജരെ കോൾ ചെയ്യുന്നതായി കാണാം. തുടർന്ന് അദ്ദേഹം തന്റെ തീരുമാനം വിശദീകരിക്കുകയും സേവനകാലത്ത് ലഭിച്ച അവസരങ്ങൾക്ക് നന്ദി പ്രകടിപ്പിക്കുകയും ചെയ്യുന്നു. "ഞാൻ രാജി വയ്ക്കാൻ പദ്ധതിയിടുന്നത് നിങ്ങളെ അറിയിക്കണമെന്ന് തോന്നി. മൈക്രോസോഫ്റ്റിലെ എന്റെ കഴിഞ്ഞ രണ്ട് വർഷങ്ങൾ ശരിക്കും ആസ്വദിച്ചു . എന്റെ സ്വന്തം വഴി പിന്തുടരാൻ പോകുകയാണ്. ഒരു പൂർണ അവസരം ഒരുക്കാൻ സ്വയം തയാറാണെന്ന് തോന്നുന്നു" ഖാൻ പറഞ്ഞു
"ഇതൊരു വലിയ ചുവടുവയ്പ്പാണ്. അഭിനന്ദനങ്ങൾ. ഞങ്ങൾ നിങ്ങളെ മിസ്സ് ചെയ്യും" ഇതായിരുന്നു മാനേജരുടെ മറുപടി. ഖാൻ തന്റെ പോസ്റ്റിൽ മാനേജരെയും സഹപ്രവർത്തകരേയും പ്രശംസിച്ചു, തനിക്ക് ലഭിച്ച പിന്തുണയെപറ്റി പറയുകയും സ്വന്തം കുതിപ്പുകൾ നടത്താൻ മറ്റുള്ളവരെ പ്രോത്സാഹിപ്പിക്കുകയും ചെയ്തു. "നല്ല പിന്തുണ നൽകുന്ന മാനേജരും ടീമും ലഭിച്ചതിൽ ഞാൻ നന്ദിയുള്ളവനാണ്. സ്വയം പന്തയം വെക്കാൻ ചിന്തിക്കുന്ന ആരും: റിസ്ക് എടുക്കുക. ജോലി ഉപേക്ഷിക്കുന്നതിനെക്കുറിച്ചുള്ള ചിന്ത ശരിക്കും വളരെ ഭയാനകമാണ്." അദ്ദേഹം പറഞ്ഞു.