പുതിയ നിയമനങ്ങള്‍ മരവിപ്പിക്കുക; കൂട്ടപ്പിരിച്ചുവിടലിനു ശേഷം ഗൂഗിള്‍ സി.ഇ.ഒക്ക് കത്തയച്ച് 1400 ജീവനക്കാര്‍

കാലിഫോര്‍ണിയ: കൂട്ടപ്പിരിച്ചുവിടലിനു ശേഷം ഗൂഗിള്‍ സി.ഇ.ഒ സുന്ദര്‍ പിച്ചൈക്ക് തുറന്ന കത്തുമായി ഗൂഗിളിന്‍റെ മാതൃകമ്പനിയായ ആല്‍ഫബെറ്റ് ഐഎന്‍സിയിലെ ജീവനക്കാര്‍. 12,000 ജീവനക്കാരെ പിരിച്ചുവിട്ട നടപടിക്കു ശേഷം 1400 ജീവനക്കാരാണ് കത്തയച്ചത്.

സുന്ദർ പിച്ചൈയെ അഭിസംബോധന ചെയ്ത തുറന്ന കത്തിൽ പുതിയ നിയമനങ്ങൾ മരവിപ്പിക്കുക, നിർബന്ധിത നിയമനങ്ങൾക്ക് മുമ്പ് സ്വമേധയാ പിരിച്ചുവിടൽ ആവശ്യപ്പെടുക, ജോലി ഒഴിവുകളില്‍ പിരിച്ചുവിട്ട തൊഴിലാളികൾക്ക് മുൻഗണന നൽകുക, രക്ഷാകർതൃ അവധി, മരണാനന്തര അവധി തുടങ്ങിയ ഷെഡ്യൂൾ ചെയ്ത ശമ്പളത്തോടുകൂടിയ അവധിക്കാലം പൂർത്തിയാക്കാൻ തൊഴിലാളികളെ അനുവദിക്കുക തുടങ്ങിയ ആവശ്യങ്ങള്‍ മുന്നോട്ടുവച്ചു. സംഘര്‍ഷാവസ്ഥയോ മാനുഷിക പ്രതിസന്ധികളോ ഉള്ള രാജ്യങ്ങളിൽ നിന്നുള്ള ജീവനക്കാരെ പിരിച്ചുവിടുന്നത് ഒഴിവാക്കണമെന്നും തൊഴിലാളികൾ ആൽഫബെറ്റിനോട് ആവശ്യപ്പെട്ടു.ആല്‍ഫബെറ്റില്‍ തൊഴിലാളികളെ വെട്ടിക്കുറയ്ക്കാനുള്ള തീരുമാനത്തിന്‍റെ പ്രത്യാഘാതങ്ങള്‍ വലുതാണെന്ന് കത്തില്‍ പറയുന്നു. തൊഴിലാളികളുടെ ശബ്ദം ഒരിടത്തും വേണ്ടത്ര പരിഗണിച്ചിട്ടില്ല. തൊഴിലാളികൾ എന്ന നിലയിൽ തങ്ങള്‍ ഒരുമിച്ചുകൂടുമ്പോള്‍ ശക്തരാണെന്നും കത്തില്‍ അവകാശപ്പെടുന്നു.

കോവിഡ് മാന്ദ്യത്തില്‍ ചെലവ് കുറയ്ക്കാനുള്ള നിക്ഷേപകരുടെ സമ്മർദത്തെത്തുടർന്ന് 6% തൊഴിലാളികളെ വെട്ടിക്കുറയ്ക്കുമെന്ന ആൽഫബെറ്റിന്‍റെ ജനുവരിയിൽ പ്രഖ്യാപനത്തെ തുടർന്നാണ് കത്തയച്ചിരിക്കുന്നത്. എന്നാല്‍ ആല്‍ഫബെറ്റിന്‍റെ വക്താവ് കത്തിനെക്കുറിച്ച് പ്രതികരിച്ചിട്ടില്ല.

ആൽഫബെറ്റ് വർക്കേഴ്സ് യൂണിയൻ, യുണൈറ്റഡ് ടെക്, അലൈഡ് വർക്കേഴ്സ്, യുഎൻഐ ഗ്ലോബൽ എന്നിവയുൾപ്പെടെയുള്ള യൂണിയനുകളുടെ പിന്തുണയുള്ള ഒരു കൂട്ടം ജീവനക്കാരാണ് കത്ത് അയച്ചത്. തൊഴിലവസരങ്ങൾ വെട്ടിക്കുറച്ചതായി പ്രഖ്യാപിച്ചതിന് ശേഷം ആരംഭിച്ച ഒരു ഡിസ്‌കോർഡ് ചാനൽ വഴിയുള്ള ചർച്ചകളിൽ നിന്നാണ് കത്തയക്കാനുള്ള തീരുമാനം. വിവിധ ഗൂഗിൾ യൂണിറ്റുകളിലും അത് നിലവിലുള്ള വിവിധ രാജ്യങ്ങളിലും പിരിച്ചുവിടലിനെക്കുറിച്ച് നിരവധി നിവേദനങ്ങൾ തയ്യാറാക്കാന്‍ ലേബർ ഗ്രൂപ്പുകൾ സഹായിച്ചിട്ടുണ്ട്.