മൂന്ന് ഇസ്രായേലി സൈനികര്‍ കൂടി കൊല്ലപ്പെട്ടതായി ഐഡിഎഫ്

ജറുസലെം: മൂന്ന് ഇസ്രായേലി സൈനികര്‍ കൂടി ഗസ്സ യുദ്ധത്തില്‍ കൊല്ലപ്പെട്ടതായി ഇസ്രായേല്‍ പ്രതിരോധ സേന. ഇതോടെ കരയാക്രമണത്തില്‍ കൊല്ലപ്പെട്ട സൈനികരുടെ എണ്ണം 223 ആയി.

14-ാം കവചിത ബ്രിഗേഡിൻ്റെ 87-ാം ബറ്റാലിയനിലെ വടക്കൻ ഇസ്രായേലി കമ്മ്യൂണിറ്റിയായ മസാദിൽ നിന്നുള്ള മേജർ നെറ്റ്സർ സിംചി(30), 646-ാം ബ്രിഗേഡിൻ്റെ 6646-ാം ബറ്റാലിയനിലെ എലിയിലെ വെസ്റ്റ് ബാങ്ക് സെറ്റിൽമെൻ്റിൽ നിന്നുള്ള ക്യാപ്റ്റൻ ഗാവ്‌രിയൽ ഷാനി (28), 646-ാം ബ്രിഗേഡിൻ്റെ 6646-ാം ബറ്റാലിയനിലെ ക്ഫാർ എറ്റ്സിയോണിലെ വെസ്റ്റ് ബാങ്ക് സെറ്റിൽമെൻ്റിൽ നിന്നുള്ള വാറൻ്റ് ഓഫീസർ യുവൽ നിർ(43) എന്നിവരാണ് കൊല്ലപ്പെട്ടത്.

തെക്കൻ ഗസ്സയിൽ ഏറ്റുമുട്ടുന്നതിനിടെയാണ് ഷാനിയും നിരും കൊല്ലപ്പെട്ടത് .ഇവിടെ വച്ച് മറ്റ് രണ്ട് സൈനികര്‍ക്ക് ഗുരുതരമായി പരിക്കേറ്റതായി ഐഡിഎഫ് വ്യക്തമാക്കി. വടക്കൻ ഗസ്സയിൽ നടന്ന പോരാട്ടത്തിലാണ് സിംചി കൊല്ലപ്പെട്ടതെന്ന് സൈന്യം അറിയിച്ചു.