ഇസ്രായേലുമായുള്ള വെടിനിർത്തലിന് ശേഷം ഇറാൻ ചൈനയിൽ നിന്ന് ഉപരിതല-വ്യോമ മിസൈൽ ബാറ്ററികൾ സ്വീകരിച്ചതായി റിപ്പോർട്ട്

തെഹ്‌റാൻ: ഇസ്രായേലുമായുള്ള 12 ദിവസത്തെ സംഘർഷത്തിന് ശേഷം 2025 ജൂൺ 24-ന് വെടിനിർത്തൽ കരാറിലെത്തിയിരുന്നു. ഇതിനുപിന്നാലെ ഇറാൻ ചൈനീസ് നിർമിത ഉപരിതല-വ്യോമ മിസൈൽ (SAM) ബാറ്ററികൾ സ്വീകരിച്ചതായി മിഡിൽ ഈസ്റ്റ് ഐ റിപ്പോർട്ട് ചെയ്യുന്നു. ഈ പ്രതിരോധ സംവിധാനങ്ങൾ ഇസ്രായേലിന്റെ ആക്രമണങ്ങളിൽ തകർന്ന വ്യോമ പ്രതിരോധ ശേഷി പുനർനിർമിക്കാനുള്ള ശ്രമത്തിന്റെ ഭാഗമാണ്.

അറബ് രാജ്യങ്ങളിൽ നിന്നുള്ള രഹസ്യാന്വേഷണ വൃത്തങ്ങൾ പറയുന്നതനുസരിച്ച് ഇറാൻ ഈ മിസൈലുകൾക്ക് പകരമായി ചൈനക്ക് എണ്ണ ശിപ്പ്മെന്റുകൾ നൽകിയെന്നാണ് വിവരം. ചൈനയാണ് ഇറാന്റെ ഏറ്റവും വലിയ എണ്ണ ഇറക്കുമതിക്കാർ. ഈ സൈനിക സഹകരണം തെഹ്‌റാനും ബീജിംഗും തമ്മിലുള്ള വർധിച്ചുവരുന്ന ബന്ധത്തെ സൂചിപ്പിക്കുന്നു. പ്രത്യേകിച്ച് പാശ്ചാത്യ രാജ്യങ്ങളിൽ നിന്നുള്ള സമ്മർദ്ദം ഇരു രാജ്യങ്ങളും നേരിടുന്ന സാഹചര്യത്തിൽ. എന്നാൽ ഇസ്രായേലിന്റെ യുഎസ്-നൽകുന്ന എഫ്-35 സ്റ്റെൽത്ത് വിമാനങ്ങൾക്കെതിരെ ഈ സംവിധാനങ്ങൾ പരിമിതമായ ഫലപ്രാപ്തി മാത്രമേ നൽകുന്നുള്ളൂ എന്ന് വിശകലന വിദഗ്ധർ അഭിപ്രായപ്പെടുന്നു. എന്നിരുന്നാലും ഇറാന്റെ മിസൈൽ ലോഞ്ച് സൈറ്റുകളും സൈനിക ഉദ്യോഗസ്ഥരെയും ലക്ഷ്യമിട്ട ഇസ്രായേൽ ആക്രമണങ്ങൾക്ക് ശേഷം വ്യോമ പ്രതിരോധം ശക്തിപ്പെടുത്താനുള്ള ഇറാന്റെ തന്ത്രത്തിന്റെ ഭാഗമാണ് ഈ നീക്കം.

കഴിഞ്ഞ ദശകങ്ങളിൽ ഇറാൻ ഇടക്കിടെ ചൈനയിൽ നിന്ന് വ്യോമ പ്രതിരോധ സംവിധാനങ്ങൾ വാങ്ങിയിരുന്നു. 1980-കളിൽ ഇറാൻ-ഇറാഖ് യുദ്ധകാലത്ത് സിൽക്ക്‌വോം മിസൈലുകൾ ലഭിച്ചു. ഗൾഫിലെ കപ്പലുകളെ ആക്രമിക്കാൻ ടാങ്കർ യുദ്ധങ്ങൾ എന്ന് വിളിക്കപ്പെടുന്ന സമയത്ത് ഇവ ഉപയോഗിച്ചിരുന്നു. 2010-ൽ ഇറാൻ HQ-9 മിസൈൽ സംവിധാനങ്ങൾ സ്വന്തമാക്കിയതായും റിപ്പോർട്ടുകൾ ഉണ്ടായിരുന്നു. ചൈനീസ് ഹാർഡ്‌വെയറിന് പുറമേ ഇറാൻ റഷ്യൻ നിർമ്മിത എസ്-300 സിസ്റ്റങ്ങൾ വിന്യസിക്കുകയും ബവാർ-373, ഖോർദാദ് സീരീസ് പോലുള്ള തദ്ദേശീയ പ്ലാറ്റ്‌ഫോമുകൾ വികസിപ്പിച്ചെടുക്കുകയും ചെയ്തിട്ടുണ്ട്.