ഗസ്സയിൽ കൊടുംക്രൂരത തുടർന്ന് ഇസ്രായേൽ; ഫലസ്തീൻ വനിതാ ഡോക്ടറുടെ 9 കുട്ടികളെ കൊലപ്പെടുത്തി

ഗസ്സസിറ്റി: ഗസ്സയിൽ വംശഹത്യയുടെ ഭാഗമായി ഇസ്രായേൽ നടപ്പാക്കുന്നത്​ നടുക്കുന്ന ആക്രമണങ്ങൾ. ഫലസ്തീൻ വനിതാ ഡോക്ടറുടെ 9 കുഞ്ഞുങ്ങളെ ഇസ്രായേൽ ​ഇന്നലെ ക്രൂരമായി കൊലപ്പെടുത്തി.

നാസർ മെഡിക്കൽ കോംപ്ലക്സിലെ അൽ തഹ്‌രീർ ആശുപത്രി പീഡിയാട്രിക് സ്പെഷ്യലിസ്റ്റ് ഡോ. അല അൽ നജ്ജാറിനാണ് മക്കളെ നഷ്ടമായത്. ഖാൻ യൂനിസിൽ ഡോക്ടറുടെ വീട്ടിലുണ്ടായ ഇസ്രായേൽ ആക്രമണത്തെ തുടർന്നാണ് കുട്ടികൾ കൊല്ലപ്പെട്ടത്. ഈ സമയത്ത്​ ഡോക്ടർ ആശുപത്രിയിൽ ഡ്യൂട്ടിയിലായിരുന്നു. ഭർത്താവ് ഗുരുതര പരിക്കുകളോടെ ആശുപത്രിയിൽ ചികിത്സയിലാണ്.

നിരപരാധികളായ കുട്ടികളെ കൊല്ലുന്നത് ഇസ്രായേൽ സൈനികർക്കൊരു വിനോദമായി മാറിയിരിക്കുന്നുവെന്ന് ഗസ്സയിലെ ഉദ്യോഗസ്ഥര്‍ വ്യക്തമാക്കുന്നു.

അതിനി​ടെ, ഇസ്രായേൽ സൈന്യം ഗസ്സയിൽ ഫലസ്തീൻ യുവാക്കളെ മനുഷ്യകവചമായി ഉപയോഗിക്കുന്നതായി വാർത്താ ഏജൻസിയായ അസോസിയേറ്റഡ് പ്രസ് തെളിവുകൾ സഹിതം റിപ്പോർട്ട് പുറത്തുവിട്ടു. കെട്ടിടങ്ങളിലേക്കും മറ്റും ഫലസ്തീൻ യുവാക്കളെ ഇസ്രായേൽ സൈനിക യൂണിഫോം അണിയിച്ച് നിർബന്ധിച്ച് പറഞ്ഞയക്കുകയാണ് ചെയ്യുന്നതെന്ന്​ സൈനികരുടെയും ഇരകളുടെയും മൊഴികൾ ഉദ്ധരിച്ച്​ റിപ്പോർട്ട്​ വ്യക്​തമാക്കി. സിവിലിയൻമാരെ മനുഷ്യകവചമായി ഉപയോഗിക്കുന്നത് അന്താരാഷ്ട്ര നിയമങ്ങൾക്ക് വിരുദ്ധവും യുദ്ധക്കുറ്റവുമാണ്.

ഇസ്രായേൽ സേന എത്ര ഭീകരമാണ്​ എന്നതിന്‍റെ തെളിവാണ്​ റിപ്പോർട്ടെന്ന്​ ഹമാസ്​ പ്രതികരിച്ചു. എന്നാൽ വാർത്ത അടിസ്ഥാനരഹിതമാണെന്ന്​ ഇസ്രായേൽ സൈന്യം അറിയിച്ചു. നൂറിലേറെ സഹായ ട്രക്കുകൾ ഗസ്സയിൽ എത്തിയെങ്കിലും ഭക്ഷണവിതരണം സംബന്ധിച്ച അവ്യക്​തത തുടരുകയാണ്​. ആയിരങ്ങൾ കൊടുംപട്ടിണിയിലായിട്ടും അടിയന്തര നടപടി വൈകുന്നതിൽ ബ്രിട്ടൻ ഉൾപ്പെടെ നിരവധി രാജ്യങ്ങൾ നടുക്കം പ്രകടിപ്പിച്ചു.

ലക്ഷങ്ങൾക്കായി വെറും ഒരു ടീസ്പൂൺ ഭക്ഷണമാണ്​ ഇസ്രായേൽ അനുവദിച്ചതെന്ന്​ യു.എൻ കുറ്റപ്പെടുത്തി. ഒരാഴ്ചക്കിടെ, 10 ആശുപത്രികൾക്ക്​ നേരെ ഇസ്രായേൽ ആസൂത്രിത ആക്രമണം നടത്തിയത്​ ഗസ്സയിലെ ആരോഗ്യ സംവിധാനങ്ങളെ അസ്ഥിരമാക്കിയതായി യുഎൻ ഏജൻസികൾ കുറ്റപ്പെടുത്തി.