അമേരിക്ക-ഇറാൻ മൂന്നാംവട്ട പരോക്ഷ ചർച്ച വ്യാഴാഴ്ച ജനീവയിൽ

ജനീവ: അമേരിക്ക, ഇറാൻ മൂന്നാംവട്ട പരോക്ഷ ചർച്ച വ്യാഴാഴ്ച ജനീവയിൽ നടക്കും. ഇരു രാഷ്ട്രങ്ങൾക്കുമിടയിൽ ഭിന്നത തുടരുമ്പോഴും പ്രതീക്ഷയുണ്ടെന്ന് ഇറാൻ വിദേശകാര്യ മന്ത്രി അബ്ബാസ്​ അറാഗ്​ചി പറഞ്ഞു. വൻ സൈനിക സമ്മർദത്തിനിടയിലും കീഴടങ്ങാത്ത ഇറാൻ നിലപാടിൽ ഡോണൾഡ് ട്രംപ് ആശ്ചര്യപ്പെട്ടതായി യുഎസ് മാധ്യമങ്ങൾ റിപ്പോർട്ട് ചെയ്തു.

യുഎസ് ഉയർത്തുന്ന സമ്മർദത്തിന് മുന്നിൽ തലകുനിക്കില്ലെന്ന് ഇറാൻ വ്യക്​തമാക്കിയിരിക്കെയാണ് അമേരിക്കയ​ുമായുള്ള മൂന്നാംവട്ട പരോക്ഷ ചർച്ച വ്യാഴാഴ്ച ജനീവയിൽ നടക്കുന്നത്. ഒമാൻ വിദേശകാര്യ മന്ത്രി ബദ്​ർ അൽ ബുസൈദിയാണ്​ ഇക്കാര്യം വെളിപ്പെടുത്തിയത്​. കരാർ സംബന്​ധിച്ച വിശദമായ കരട്​ നിർദേശം ഇറാൻ ഉടൻ അമേരിക്കക്ക്​ കൈമാറും. ഇറാനെതിരെ കൂടുതൽ യുദ്ധസന്നാഹങ്ങൾ അമേരിക്ക തുടരുന്ന സാഹചര്യത്തിലാണ്​ ആണവ കരാർ സാധ്യത മുന്നിൽ കണ്ട്​ ഇരു രാജ്യങ്ങളും ജനീവയിൽ ചർച്ചക്ക്​ ഒരുങ്ങുന്നത്​.

യുറേനിയം സമ്പുഷ്ടീകരണ തോത്​ കുറക്കാനും അന്താരാഷ്ട്ര ആണവോർജ സമിതിക്ക്​ ചുവടെ ശക്​തമായ നിരീക്ഷണ സംവിധാനം ഒരുക്കാനും സന്നദ്ധമാണെന്ന്​ ഇറാൻ മധ്യസ്ഥ രാജ്യങ്ങളെ അറിയിച്ചു. യുറേനിയം സമ്പുഷ്ടീകരണം ഇറാനു പുറത്തേക്ക്​ മാറ്റണമെന്ന നിർദേശം രാജ്യത്തിന്‍റെ അന്തസിന്​ ചേർന്ന ഒന്നല്ലെന്ന്​ വിദേശകാര്യ മന്ത്രി അബ്ബാസ്​ അറാഗ്​ചി പറഞു. തദ്ദേശീയമായി വലിയ വില നൽകി വികസിപ്പിച്ചെടുത്ത ആണവ സാങ്കേതികത ഇറാന്​ ഏറെ വിലപ്പെട്ട ഒന്നാണെന്നും അദ്ദേഹം വ്യക്​തമാക്കി. അമേരിക്കയുമായി ആണവ കരാർ സംബന്​ധിച്ച്​ ഭിന്നത തുടരുന്ന സാഹചര്യത്തിൽ ജനീവ ചർച്ച കൂടുതൽ നിർണായകമാകും.

നയതന്ത്ര പ്രശ്​നപരിഹാരമാണ്​ കാംക്ഷിക്കുന്നതെങ്കിലും യു.എസിന്‍റെ സൈനികനീക്കങ്ങൾ സൂക്ഷ്മമായി നിരീക്ഷിച്ചു വരികയാണെന്നും ഏതു സാഹചര്യം നേരിടാനുംസേന സജ്​ജമാണെന്നും ഇറാൻ അറിയിച്ചു. അതിനിടെ, വൻ യുദ്ധസന്നാഹങ്ങൾക്കിടയിലും കീഴടങ്ങാൻ കൂസാക്കാത്ത ഇറാന്‍റെ പ്രകൃതം തന്നെ അദ്​ഭുതപ്പെടുത്തുന്നതായി ട്രംപ്​ പറഞതായി അമേരിക്കയുടെ പശ്​ചിമേഷ്യൻ ദൂതൻ സ്റ്റിവ്​ വിറ്റ്​കോഫ്​ പ്രതികരിച്ചു. അമേരിക്കയുടെ സൈനിക ഭീഷണി തുടരുന്നതിനിടെ തെഹ്​റാൻ ഉൾപ്പടെ രാജ്യത്തെ വിവിധ സർവകലാശാലകളിൽ സർക്കാർ വിരുദ്ധ പ്രക്ഷോഭം പുനരാരംഭിച്ചതായും റിപ്പോർട്ടുണ്ട്​.