വെടിനിർത്തൽ കരാറിന്റെ രണ്ടാം ഘട്ടം ആരംഭിക്കുന്നതിനുള്ള ചർച്ചകൾക്ക് ഇന്ന് തുടക്കം; ഗസ്സയിൽ വൈദ്യുതി വിലക്കി ഇസ്രായേൽ

ദോഹ: ഗസ്സയിലെ വെടിനിർത്തൽ കരാറിന്റെ രണ്ടാംഘട്ടം ആരംഭിക്കുന്നതിനുള്ള ചർച്ചകൾക്ക് ഇന്ന്​ ദോഹയിൽ തുടക്കം.

ഖത്തർ തലസ്ഥാനമായ ദോഹയിലെത്തുന്ന ഇസ്രായേൽ പ്ര​തി​നി​ധി​ സം​ഘ​വുമായി മധ്യസ്ഥ രാജ്യങ്ങൾ മുഖേന ഹമാസ്​ രണ്ടാംഘട്ട വെടിനിർത്തൽ സംബന്ധിച്ച ചർച്ചകള്‍ക്ക്​ തുടക്കം കുറിക്കും. ഗസ്സക്ക്​ മേൽ ഇസ്രായേൽ ഏർപ്പെടുത്തിയ ഉപരോധം ഒരാഴ്ച പിന്നിട്ടിരിക്കെ, ചർച്ച എത്രകണ്ട്​ വിജയിക്കും എന്ന ആശങ്ക നിലനിൽക്കുന്നുണ്ട്​. ഇസ്രായേൽ പ്രധാനമന്ത്രി ബിന്യമിൻ നെതന്യാഹുവിന്‍റെ രാഷ്ട്രീയ ഉപദേശകൻ ഒഫിർ ഫാൾക്കും ഇസ്രായേൽ സംഘത്തിലുണ്ട്​.

ഈ​ജി​പ്തി​ന്റെയും ഖ​ത്ത​റി​ന്റെയും മ​ധ്യ​സ്ഥ​രു​മാ​യുള്ള ച​ർ​ച്ച​യോട്​ തുറന്ന മനസാണുള്ളതെന്ന്​ ഹ​മാ​സ്​ പ്ര​തി​ക​രി​ച്ചു. എല്ലാ ബന്ദികളുടെയും മോചനം ഉറപ്പുവരുത്തുകയെന്നതാണ്​ പ്രസിഡന്‍റ്​ ഡോണൾഡ്​ ട്രംപിന്‍റെ നയമെന്നും ദോഹയിൽ നടക്കുന്ന ചർച്ചയിൽ പ്രതീക്ഷയുണ്ടെന്നും​ യുഎസ്​ പ്രതിനിധി ആദം ബോഹ്​ലർ പറഞ്ഞു. അധികം വൈകാതെ തന്നെ കരാർ നിലവിൽ വരുമെന്നും അദ്ദേഹം പ്രത്യാശ പ്രകടിപ്പിച്ചു.

രണ്ടു മാസം നീളുന്ന വെടിനിർത്തൽ കരാറിലൂടെ എല്ലാ ബന്ദികളെയും കൈമാറുന്ന പുതിയൊരു നിർദേശം മധ്യസ്ഥ രാജ്യമായ ഈജിപ്ത്​ മുന്നോട്ടുവെച്ചതായും റിപ്പോർട്ടുണ്ട്​.

അതിനിടെ, സഹായം പൂർണമായും വിലക്കിയതിനു പുറമെ ഗസ്സക്കുള്ള വൈദ്യുതി ബന്ധവും ഇസ്രായേൽ വിച്ഛേദിച്ചു. ഉപരോധത്തിൽ വലയുന്ന ഗസ്സ നിവാസികളുടെ ജീവിതം ഇതോടെ കൂടുതൽ ദുരിതപൂർണമാകും. ഇതിനിടെ ഗസ്സയിൽ നിന്ന്​ ഫലസ്തീൻ ജനതയെ പുറന്തള്ളാനുള്ള ട്രംപ്​ പദ്ധതി ഉടൻ പ്രയോഗവത്​കരിക്കണമെന്ന്​ തീവ്ര വലതുപക്ഷ മന്ത്രി സ്​മോട്രിച്ച്​ ആവശ്യപ്പെട്ടു.

ദിവസവും അയ്യായിരം പേരെ വീതം പേരെ ഗസ്സയിൽ നിന്ന്​ മാറ്റിയാൽ ഒരു വർഷം വേണ്ടിവരുന്ന പ്രക്രിയയാണിതെന്നും സ്​മോട്രിച്ച്​ പ്രതികരിച്ചു. ഇസ്രായേൽ പ്രധാനമന്ത്രി ബിന്യമിൻ നെതന്യാഹു പുതിയ സൈനിക മേധാവി ഇയാൽ സാമിറുമായി വിശദമായ കൂടിക്കാഴ്ച നടത്തി. ദോഹ ചർച്ച വഴിമുട്ടിയാൽ ഗസ്സയിൽ ആക്രമണം പുനരാരംഭിക്കുന്ന കാര്യവും ചർച്ചയിൽ ഇടംപിടിച്ചതായി ഇസ്രായേൽ മാധ്യമങ്ങൾ റിപ്പോർട്ട്​ ചെയ്തു.