ഗസ്സയിൽ രണ്ടാംഘട്ട വെടിനിർത്തൽ പ്രാബല്യത്തിൽ; ഇടക്കാല സമാധാന ഭരണസമിതിയുടെ ആദ്യയോഗം അടുത്തയാഴ്ച

​ഗസ്സ സിറ്റി: ഗസ്സയിൽ രണ്ടാംഘട്ട വെടിനിർത്തൽ കരാർ പ്രാബല്യത്തിൽ. രണ്ടാംഘട്ടം ഇന്നലെ മുതൽ പ്രാബല്യത്തിൽ വന്നതായി അമേരിക്ക അറിയിച്ചു. യുഎസ്​ പശ്ചിമേഷ്യൻ ദൂതൻ സ്റ്റീവ്​ വിറ്റ്കോഫാണ്​ പ്രഖ്യാപനം നടത്തിയത്​. കരാർ നടപ്പാക്കാൻ ഹമാസ് സന്നദ്ധമാകുമെന്ന് പ്രതീക്ഷിക്കുന്നതായും വിറ്റ്കോഫ് പറഞ്ഞു. അവസാന ബന്ദിയുടെ മൃതദേഹം ഹമാസ് കൈമാറിയില്ലെങ്കിൽ ഗുരുതര പ്രത്യാഘാതം ഉണ്ടാകുമെന്നും അദ്ദേഹം മുന്നറിയിപ്പ്​ നൽകി.

ഇടക്കാല ഭരണ സംവിധാനം, ഹമാസിന്റെ ആദ്യഘട്ട നിരായുധീകരണം, ഗസ്സ പുനർനിർമാണം എന്നിവയാകും രണ്ടാംഘട്ടത്തിൽ നടപ്പാക്കുക. ഇടക്കാല സമാധാന ഭരണസമിതിയുടെ ആദ്യയോഗം അടുത്ത ആഴ്ച യുഎസ് ​പ്രസിഡന്‍റ്​ ഡോണൾഡ്​ ട്രംപിന്റെ അധ്യക്ഷതയിൽ സ്വിറ്റ്സർലൻഡിലെ ദവോസിൽ ചേരും. നികോളായി മ്ലദനോവ്​ സമിതിയുടെ പ്രവർത്തനം ഏകോപിപ്പിക്കുമെന്ന്​ യുഎസ്​ മാധ്യമങ്ങൾ റിപ്പോർട്ട്​ചെയ്തു. ഫലസ്തീൻ ടെക്നോക്രാറ്റുകൾ ഉൾപ്പെടുന്ന സമിതിക്ക്​ ഹമാസും ഇസ്രായേലും പിന്തുണ അറിയിച്ചതായാണ്​ വിവരം.

കെയ്റോയിൽ ചേർന്ന ഫലസ്തീൻ കൂട്ടായ്മകളുടെ യോഗം രണ്ടാംഘട്ട വെടിനിർത്തലിന്​ പിന്തുണ അർപ്പിച്ചു. ഹമാസ്​ ഉൾപ്പെടെയുള്ള സംഘടനകളാണ് യോ​ഗം ചേർന്നത്. ഇസ്രായേൽ സൈന്യം പിന്മാറണമെന്നും ഗസ്സയിലേക്ക്​ വിലക്കുകൾ ഇല്ലാതെ സഹായം എത്തിക്കണമെന്നും ഫലസ്തീൻ കൂട്ടായ്മകൾ ആവശ്യപ്പെട്ടു. രണ്ടാംഘട്ട വെടിനിർത്തൽ യാഥാർഥ്യമാക്കാൻ ശ്രമിച്ച ഖത്തർ, ഈജിപ്ത്​, തുർക്കി എന്നീ മധ്യസ്ഥ രാജ്യങ്ങൾക്ക്​ അമേരിക്ക നന്ദി അറിയിച്ചു.

രണ്ടാംഘട്ട വെടിനിർത്തലിനെ സ്വാഗതം ചെയ്ത ഇസ്രായേൽ, അവസാന ബന്ദിയുടെ മൃതദേഹം കൈമാറിയില്ലെങ്കിൽ തുടർ നടപടികളുമായി സഹകരിക്കില്ലെന്നും മുന്നറിയിപ്പ്​ നൽകി. അതേസമയം, വെടിനിർത്തലിന്റെ രണ്ടാംഘട്ടം പ്രാബല്യത്തിൽ വന്നെങ്കിലും‍ റഫ അതിർത്തി തുറക്കുന്നതു സംബന്ധിച്ച്​ തീരുമാനം ആയില്ല.

ഒന്നാം ഘട്ട വെടിനിർത്തൽ കാലയളവിൽ കരാർ ലംഘിച്ച് ഗസ്സയിൽ ഇസ്രായേൽ നിരവധി തവണ ആക്രണം നടത്തിയിരുന്നു. 1200ലേറെ തവണയാണ് ഇസ്രായേൽ വെടിനിർത്തൽ കരാർ ലംഘിച്ചത്. 450ലേറെ പേരാണ് ഇക്കാലയളവിൽ മാത്രം കൊല്ലപ്പെട്ടത്. 1250ലേറെ പേർക്ക് പരിക്കേറ്റിരുന്നു. ​ഗസ്സയിൽ ഇതുവരെ 71500ലേറെ പേർ കൊല്ലപ്പെടുകയും 171,324 പേർക്ക് പരിക്കേൽക്കുകയും ചെയ്തു.