ഒമാൻ ഉപപ്രധാനമന്ത്രി സയ്യിദ് ഫഹദ് ബിൻ മഹ്‌മൂദ് അൽ സഈദ് അന്തരിച്ചു

മസ്‌കത്ത് ഒമാൻ ഉപപ്രധാനമന്ത്രി സയ്യിദ് ഫഹദ് ബിൻ മഹ്‌മൂദ് അൽ സഈദ് (82) അന്തരിച്ചു. ഇന്ന് രാവിലെയായിരുന്നു അന്ത്യമെന്ന് ഒമാൻ റോയൽ കോർട്ട് അറിയിച്ചു. ആധുനിക ഒമാന്റെ വളർച്ചയിൽ നിർണായക പങ്കുവഹിച്ച അദ്ദേഹം രാജ്യത്തെ ഏറ്റവും മുതിർന്ന നയതന്ത്രജ്ഞരിൽ ഒരാളായിരുന്നു. ഒമാന്റെ രാഷ്ട്രീയ സാമൂഹിക മേഖലകളിൽ അഞ്ച് പതിറ്റാണ്ടിലേറെ നീണ്ടുനിന്ന സമാനതകളില്ലാത്ത സേവനത്തിന് ശേഷമാണ് അദ്ദേഹം വിടവാങ്ങിയത്.

1940ൽ മസ്‌കത്തിൽ ജനിച്ച സയ്യിദ് ഫഹദ്, കെയ്റോ യൂണിവേഴ്സിറ്റിയിൽ നിന്നും പാരീസിലെ സോർബോൺ യൂണിവേഴ്സിറ്റിയിൽ നിന്നും ഉന്നത വിദ്യാഭ്യാസം പൂർത്തിയാക്കിയ ശേഷമാണ് ഭരണരംഗത്തേക്ക് എത്തിയത്. മുൻ സുൽത്താൻ ഖാബൂസ് ബിൻ സഈദിന്റെ ഭരണകാലത്താണ് ഔദ്യോഗിക ജീവിതം ആരംഭിച്ചത്. വിദേശകാര്യ മന്ത്രി, വാർത്താവിനിമയ സാംസ്‌കാരിക മന്ത്രി തുടങ്ങിയ പദവികൾ വഹിച്ച അദ്ദേഹം 1994 മുതൽ രാജ്യത്തിന്റെ ഉപപ്രധാനമന്ത്രിയായി സേവനമനുഷ്ഠിച്ചു വരികയായിരുന്നു. അറബിക്, ഇംഗ്ലീഷ്, ഫ്രഞ്ച് ഭാഷകളിൽ അഗാധ പാണ്ഡിത്യമുണ്ടായിരുന്ന അദ്ദേഹം ലോകവേദികളിൽ ഒമാന്റെ ശബ്ദമായി തിളങ്ങി.

അറബ് ലോകത്തെയും അന്താരാഷ്ട്ര തലത്തിലെയും വിവിധ ഉച്ചകോടികളിൽ ഒമാന്റെ മുഖമായിരുന്നു അദ്ദേഹം. കൂടാതെ അയൽരാജ്യങ്ങളുമായുള്ള ബന്ധം ദൃഢമാക്കുന്നതിൽ എന്നും മുൻപന്തിയിൽ നിന്നു. റോയൽ ഓപ്പറ ഹൗസ് മസ്‌കത്ത്, സുൽത്താൻ ഖാബൂസ് സർവകലാശാല തുടങ്ങിയ പ്രമുഖ സ്ഥാപനങ്ങളുടെ മേധാവിയായും അദ്ദേഹം മികച്ച പ്രവർത്തനം കാഴ്ചവെച്ചു. സൗമ്യമായ പെരുമാറ്റവും പക്വമായ നയതന്ത്രജ്ഞതയും അദ്ദേഹത്തെ ജനപ്രിയനാക്കി. സയ്യിദ് ഫഹദിന്റെ നിര്യാണത്തിൽ റോയൽ കോർട്ട് അനുശോചനം രേഖപ്പെടുത്തി.