പാ-തി

ഈസ്ട്രജന്‍ കണികകളുടെ ഒരു കടല്‍.

ചൂരല്‍ക്കുട്ടയുമായ് ഒരുവള്‍

അതിലേക്ക് ആണ്ടു മുങ്ങുന്നു.

ഒട്ടു നേരം കഴിഞ്ഞ്,

ഹൃദയങ്ങള്‍ നിറച്ച കുട്ടകവുമായ്

പൊങ്ങി വരുന്നു.

നീറ്റുകക്ക കണക്ക് പൊള്ളിപ്പിടയുന്ന ഹൃദയങ്ങള്‍.

അവ തുള്ളിത്തുള്ളി തെറിക്കുന്നു.

കുട്ടകം ചുവക്കുന്നു;

അതേന്തിയ കൈകള്‍,

താങ്ങിയ ഉടല്‍,

എല്ലാം ചുവക്കുന്നു.

വാരിക്കെട്ടിയ

മുടി പെയ്യുന്നു.

മദജലം രുചിച്ച

ചുണ്ടുകള്‍ പെയ്യുന്നു.

മഴവില്ലു വരക്കുന്നതു നിര്‍ത്തി

ആകാശം അതു നോക്കി നില്‍ക്കുന്നു.

'ഹും ! അവളുടെ ഉള്ളിലൊരുവന്‍

തീകാഞ്ഞു കൊണ്ട്

രഹസ്യമായ് താമസിക്കുന്നു!'

എന്നു പിറുപിറുത്തുകൊണ്ട്

തന്റെ കറുത്ത കുതിരകളിലൊന്നിനെ

താഴേക്കു പായിക്കുന്നു.