പുഷ്പാ ടെക്സ്റ്റയില്‍സ്
കവിത | പുഷ്പാ ടെക്സ്റ്റയില്‍സ് | റോബിന്‍ എഴുത്തുപുര
Listen to this Article
ഷര്‍ട്ടൊരെണ്ണം
വാങ്ങാമെന്ന് കരുതി
ടൗണിലെ കടയില്‍ കയറി.
അന്നിത്
പുഷ്പാ സിറോക്‌സ് & എസ്.ടി.ഡി ബൂത്തായിരുന്നു ;
എത്രയെത്ര പകര്‍പ്പുകള്‍,
കടങ്ങള്‍ ...
പിന്നീട്
പുഷ്പാ ഫ്‌ളവേഴ്‌സായപ്പോള്‍
പൂവും പൂക്കാലവും
തൂക്കിവാങ്ങിക്കാമായിരുന്നു.
മുറിത്തുണിയില്‍
നൂലു മുറുക്കി
കറങ്ങിക്കറങ്ങിച്ചിരിച്ച
പുഷ്പാ ടെയ്‌ലറിംഗ് ,
'സന്ദര്‍ശ'നത്തിലേതുപോലേ
അധികനേരങ്ങള്‍
മൗനംകുടിച്ച് കാത്തിരുന്ന
പുഷ്പാ മാട്രിമോണിയല്‍ ....
ഒരെണ്ണം ബോധിച്ചപ്പോഴേക്കും
സെയില്‍സ്‌ഗേള്‍
നീലഷര്‍ട്ടൊരെണ്ണം കൊണ്ടുവന്നു
'ഇവിടെ തുന്നിയതാ '
പാകമല്ലെങ്കിലും
അതിട്ട് പുത്തന്‍ഞുള്ളുകള്‍
പാഞ്ഞുപോകുന്ന റോഡിലേക്കിറങ്ങി.
