കേരളത്തിലെ യുവതികളുടെ ആത്മഹത്യ: വീട്ടകങ്ങളിലെ നിശ്ശബ്ദ നിലവിളികൾ കേൾക്കുന്നതെങ്ങിനെ ?

കേരളം, ഉയർന്ന സാക്ഷരതാ നിരക്കും മെച്ചപ്പെട്ട സാമൂഹിക സൂചികകളുമുള്ള ഒരു പുരോഗമന സംസ്ഥാനമായി ലോകത്തിന് മുന്നിൽ തലയുയർത്തി നിൽക്കുമ്പോഴും അതിൻ്റെയുള്ളിൽ ഒരു ഇരുൾമറ ഒളിഞ്ഞുകിടക്കുന്നു. വിദ്യാഭ്യാസവും സ്വാതന്ത്ര്യവുമുള്ള ഒരുപാട് യുവതികളായ ഭാര്യമാർ ആത്മഹത്യയിലൂടെ ജീവിതം അവസാനിപ്പിക്കുന്നത് വർധിച്ചുവരികയാണ്. ഈ കണക്കുകൾ ഞെട്ടലുണ്ടാക്കന്നതിനേക്കാൾ, നമ്മെ കൂടുതൽ ചിന്തിപ്പിക്കേണ്ടതുണ്ട്. കാരണം,ഓരോ മരണവും തകർന്ന സ്വപ്നങ്ങളുടെയും സഹിക്കാനാവാത്ത വേദനയുടെയും പങ്കുവക്കാനാവാത്ത ദുരിതങ്ങളുടെയും നേർസാക്ഷ്യമാണ്.

ഒരു നഗരത്തിലെ ആധുനിക അപ്പാർട്ട്മെൻ്റിൻ്റെ നാല് ചുവരുകൾക്കുള്ളിൽ അവസാനിച്ച മായ എന്ന യുവതിയുടെ കഥ ഒരു ഉദാഹരണമാണ്. അവൾ സാഹിത്യത്തിൽ ബിരുദാനന്തര ബിരുദമുള്ളവളായിരുന്നു. എന്നാൽ വിവാഹശേഷം, അവളുടെ ലോകം അടുക്കളയിലെ പുകയിലും അലക്കാനുള്ള തുണികളുടെ കൂമ്പാരത്തിലും ഭർത്താവിൻ്റെ വീട്ടുകാരുടെ മൂർച്ചയേറിയ വാക്കുകളിലും ചുറ്റിപ്പിണഞ്ഞു. അവൾക്ക് വരക്കാൻ ഇഷ്ടമായിരുന്നു, പാട്ട് പാടാൻ ഇഷ്ടമായിരുന്നു. പക്ഷേ, അവളുടെ സ്വപ്നങ്ങളെല്ലാം സ്ത്രീധനത്തിൻ്റെ പേരിൽ വന്ന പരിഹാസങ്ങൾക്കും അവഗണനകൾക്കും മുന്നിൽ മങ്ങിപ്പോയി. ഭർത്താവിൻ്റെ മൗനം പോലും അവളെ വേദനിപ്പിച്ചു.

പുറത്തുനിന്ന് നോക്കുന്നവർക്ക്, മായയെപ്പോലുള്ള സ്ത്രീകളുടെ ജീവിതം എല്ലാം തികഞ്ഞതായിരിക്കും. പക്ഷേ, യഥാർത്ഥത്തിൽ അവർ താക്കോലില്ലാത്ത ഒരു സ്വർണ്ണക്കൂട്ടിൽ അകപ്പെട്ട പക്ഷികളെപ്പോലെയാണ്. ഒരുപാട് കാര്യങ്ങൾ അവരെ നിശ്ശബ്ദരാക്കുന്നു. അതിൽ ഏറ്റവും പ്രധാനം നമ്മുടെ സമൂഹത്തിൻ്റെ 'സഹിക്കാനുള്ള സംസ്കാരമാണ്'. 'വിവാഹത്തിൽ പ്രശ്നങ്ങളുണ്ടാകും, നീ അഡ്ജസ്റ്റ് ചെയ്ത് ജീവിക്കണം' എന്ന് മാതാപിതാക്കൾ പോലും ഉപദേശിക്കുമ്പോൾ, ഒരു സ്ത്രീക്ക് സഹായം തേടാൻ പോലും കഴിയാതെ വരുന്നു. വിവാഹമോചനം ഒരു വലിയ സാമൂഹിക കളങ്കമായി കണക്കാക്കുന്നതിനാൽ, മായയെപ്പോലെയുള്ളവർ സ്വന്തം വീട്ടിൽപ്പോലും ഒരു അന്യയായി മാറുന്നു.

ഈ പ്രതിസന്ധിയിലെ ഏറ്റവും പ്രധാനപ്പെട്ട ഒരു വില്ലൻ മാനസികാരോഗ്യത്തെക്കുറിച്ചുള്ള നമ്മുടെ തെറ്റിദ്ധാരണകളാണ്. "വിഷാദം," "ഉത്കണ്ഠ" തുടങ്ങിയ വാക്കുകൾ ഇപ്പോഴും നമ്മുടെ വീടുകളിൽ ഒരു വിഷയമല്ല. മാനസിക വേദന വ്യക്തിപരമായ പോരായ്മയായിട്ടാണ് പലരും കാണുന്നത്. അതിനാൽ, ഒരു യുവതി ദുഃഖിച്ചിരിക്കുകയോ, നിശ്ശബ്ദയാവുകയോ ചെയ്യുമ്പോൾ, "അവൾ പുതിയ ജീവിതത്തിലെ പിരിമുറുക്കം കാരണം ക്ഷീണിച്ചതാണ്" എന്ന് പറഞ്ഞ് നമ്മൾ തള്ളിക്കളയുന്നു. അവളുടെ വിളറിയ ശബ്ദവും, അവ്യക്തമായ സന്ദേശങ്ങളും സഹായത്തിനായുള്ള ഒരു കരച്ചിലാണെന്ന് നമ്മൾ തിരിച്ചറിയുന്നില്ല. മായയുടെ അമ്മയുടെ വാക്കുകൾ ഈ ദുരവസ്ഥയെ ഓർമ്മിപ്പിക്കുന്നു: "അവൾ വിളിച്ചപ്പോൾ ഞാൻ തിരക്കിലായിരുന്നു... അവളുടെ ശബ്ദം നിർജ്ജീവമായിരുന്നു..."

സ്ത്രീധന സമ്പ്രദായം നിയമം മൂലം നിരോധിച്ചിട്ടുണ്ടെങ്കിലും, അത് ഇപ്പോഴും ഭയാനകമായ ഒരു സാമൂഹിക പ്രശ്നമായി തുടരുന്നു. "നൽകിയ സ്വർണം പോരാ" എന്നോ "നിങ്ങളുടെ കുടുംബം സാമ്പത്തികമായി പിന്നിലാണ്" എന്നോ നിനക്ക് നിറം തീരെ പോരാ എന്നോ നിനക്ക് ഇംഗ്ലീഷ് സംസാരിക്കാൻ അറിയില്ല എന്നോ ഒക്കെയുള്ള കുറ്റപ്പെടുത്തലുകൾ പല

സ്ത്രീകളുടെയും മാനസികാവസ്ഥയെ തകർക്കുന്നു. ഈ പീഡനങ്ങൾ ശാരീരിക ആക്രമണങ്ങൾ പോലെ ഭീകരമല്ലായിരിക്കാം. പക്ഷേ അവ ഒരു സ്ത്രീയുടെ ആത്മാഭിമാനത്തെയാണ് ഇല്ലാതാക്കുന്നത്.

ഈ പ്രശ്നത്തോട് നമുക്ക് ബഹുതല സമീപനം വേണം. അതിൽ ഓരോരുത്തരും മനസ്സിലാക്കിയിരിക്കേണ്ട ചാല പ്രധാന കാര്യങ്ങൾ ഇവയാണ്:

• അപകട സൂചനകൾ തിരിച്ചറിയുക: ഒരു സ്ത്രീയുടെ പെരുമാറ്റത്തിൽ വരുന്ന സൂക്ഷ്മമായ മാറ്റങ്ങൾ തിരിച്ചറിയണം. അതായത് സാമൂഹിക ഇടപെടലുകളിൽ നിന്ന് ഒഴിഞ്ഞുമാറുക, താൽപ്പര്യമില്ലായ്മ കാണിക്കുക, അമിതമായ മൗനം, അല്ലെങ്കിൽ നിരാശാജനകമായ സംഭാഷണങ്ങൾ എന്നിവയെല്ലാം ഒരു മാനസികാരോഗ്യ പ്രതിസന്ധിയുടെ ലക്ഷണങ്ങളാകാം. ഇവയെ അവഗണിക്കരുത്.
• സാമ്പത്തിക സ്വാതന്ത്ര്യം ഉറപ്പാക്കുക :ഉയർന്ന വിദ്യാഭ്യാസ യോഗ്യതകളുണ്ടായിട്ടും, പല സ്ത്രീകളും വിവാഹശേഷം വീട്ടുജോലികളിൽ ഒതുങ്ങിപ്പോകുന്നു. ഇത് സാമ്പത്തിക സ്വാതന്ത്ര്യമില്ലായ്മയിലേക്കും, തങ്ങളുടെ ജീവിതം നിയന്ത്രിക്കുന്ന സാഹചര്യങ്ങളിൽ നിന്ന് പുറത്തുകടക്കാനുള്ള
• ശേഷിയില്ലായ്മയിലേക്കും അവരെ നയിക്കുന്നു. വിവാത്തിന് മുന്പ് തന്നെ സ്ത്രീകൾ പഠനവും ജോലിയും ഉറപ്പാക്കാൻ ശ്രമിക്കുക.
• സാമൂഹിക മാറ്റങ്ങൾ പ്രോത്സാഹിപ്പിക്കുക: മാനസികാരോഗ്യത്തെക്കുറിച്ചുള്ള സംഭാഷണങ്ങൾ സാധാരണമാക്കാൻ സമൂഹം തയ്യാറാകണം. സഹായം തേടുന്നത് ബലഹീനതയുടെ ലക്ഷണമല്ല, മറിച്ച് ശക്തിയുടെ ലക്ഷണമാണെന്ന് മനസ്സിലാക്കണം. സ്കൂളുകൾ, കമ്മ്യൂണിറ്റി സെൻ്ററുകൾ, മതസ്ഥാപനങ്ങൾ എന്നിവയ്ക്ക് ഇതിൽ പ്രധാന പങ്ക് വഹിക്കാൻ കഴിയും.
• സഹായം തേടുന്നതിനുള്ള ധൈര്യം: മാനസികാരോഗ്യ സഹായം തേടുന്നത് ഒരു ബലഹീനതയുടെ ലക്ഷണമായി കാണരുത്. നിങ്ങൾ മാനസികമായി ബുദ്ധിമുട്ടുന്നുണ്ടെങ്കിൽ, വിശ്വസ്തരായ സുഹൃത്തുക്കളോടോ, കുടുംബാംഗങ്ങളോടോ, അല്ലെങ്കിൽ ഒരു പ്രൊഫഷണൽ കൗൺസിലറോടോ സൈക്കോളജിസ്റ്റിനോടോ സംസാരിക്കുന്നത് വളരെ പ്രധാനമാണ്.
• സാമൂഹിക മാറ്റത്തിന് തുടക്കമിടുക: സ്ത്രീധനം സാമൂഹിക വിരുദ്ധവും സ്ത്രീവിരുദ്ധവുമായ സന്പ്രദായമാണെന്ന അവബോധം പുതുതലമുറയിൽ
• സൃഷ്ടിക്കണം. ആണകുട്ടികളെയും പെൺകുട്ടികളെയും ഈ അവബോധം സൃഷ്ടിക്കുന്ന തരത്തിൽ രക്ഷിതാക്കൾ രൂപപ്പെടുത്തണം. നിലവിലുള്ള സ്ത്രീധന വിരുദ്ധ നിയമങ്ങൾ കർശനമായി നടപ്പാക്കണം. സ്ത്രീധനവുമായി ബന്ധപ്പെട്ട കുറ്റകൃത്യങ്ങൾ റിപ്പോർ്ട്ട ചെയ്യാനും നിയനടപടികൾ േഗത്തിൽ പൂർത്തിയാക്കാനും ലളിതമായി സംവിധാനങ്ങളൊരുക്കണം.
• പരസ്പരമുള്ള പിന്തുണ: പ്രാദേശിക എൻജിഒകളും വനിതാ കൂട്ടായ്മകളും നൽകുന്ന പിന്തുണ വളരെ നിർണ്ണായകമാണ്. ഈ കൂട്ടായ്മകൾക്ക് കൂടുതൽ സർക്കാർ തല പിന്തുണ നൽകണം. കൂടാതെ നമുക്ക് ചുറ്റുമുള്ള സ്ത്രീകളുടെ പ്രശ്നങ്ങളെക്കുറിച്ച് നമ്മൾ കൂടുതൽ ശ്രദ്ധാലുക്കളായിരിക്കണം. പുരോഗതിയെ സാക്ഷരതയും ആരോഗ്യ സ്ഥിതിവിവരക്കണക്കുകളും കൊണ്ട് മാത്രമല്ല അളക്കേണ്ടത്. ഓരോ വ്യക്തിയുടെയും ക്ഷേമത്തിലാണ് യഥാർത്ഥ പുരോഗതി. ഭയത്തിൽ നിന്നും നിരാശയിൽ നിന്നും മുക്തമായി ഓരോ സ്ത്രീക്കും അന്തസ്സുള്ള ജീവിതം നയിക്കാൻ കഴിയുന്ന ഒരു സമൂഹം കെട്ടിപ്പടുക്കണം.
• സർക്കാരിൻ്റെ പങ്കാളിത്തം: മനശാസ്ത്രപരമായ പിന്തുണയും നിയമസഹായവും എളുപ്പത്തിൽ
• ലഭ്യമാക്കണം. മിത്ര 181 (ദുരിതത്തിലായ സ്ത്രീകൾക്കായുള്ള 24/7 ഹെൽപ്പ് ലൈൻ), ദിശ 1056 (സംസ്ഥാന മാനസികാരോഗ്യ അതോറിറ്റി ഹെൽപ്പ് ലൈൻ), കേരള സ്റ്റേറ്റ് ലീഗൽ സർവീസസ് അതോറിറ്റി (KSLSA- അർഹരായവർക്ക് സൗജന്യ നിയമസഹായം നൽകുന്ന സംവിധാനം) തുടങ്ങിയവയെ പരിചയപ്പെടുക, പരിചയപ്പെടുത്തുക. ഈ സംവിധാനങ്ങൾ ശക്തിപ്പെടുത്തുക.
• മാതാപിതാക്കളുടെ ശ്രദ്ധ: എല്ലാ മാതാപിതാക്കളും തങ്ങളുടെ മകളുടെ ദുരിതത്തെ വെറും "അഡ്ജസ്റ്റ്മെൻ്റ് പ്രശ്നമായി" തള്ളിക്കളയാതെ, അവരുടെ മാനസികാരോഗ്യത്തിനും സുരക്ഷയ്ക്കും മുൻഗണന നൽകണം.

ഒരു സമൂഹം എന്ന നിലയിൽ, മറ്റൊരു മായയുടെ ജീവിതം ഇങ്ങനെ അവസാനിക്കാതിരിക്കാൻ നമുക്ക് പ്രവർത്തിക്കാം. എല്ലാ സ്ത്രീകൾക്കും ഭയമില്ലാതെ, അന്തസ്സോടെ ജീവിക്കാൻ കഴിയുന്ന ഒരു അന്തരീക്ഷം സൃഷ്ടിക്കാം. പുരോഗതിയെ സാക്ഷരതയുടെയും ആരോഗ്യത്തിൻ്റെയും കണക്കുകൾ കൊണ്ട് മാത്രം അളക്കാതെ, ഓരോ വ്യക്തിയുടെയും മാനസിക സന്തോഷത്തിലും സുരക്ഷയിലും അളന്നുതുടങ്ങാം.

നിങ്ങൾ ഒറ്റക്കല്ല. നിങ്ങളുടെ ജീവിതത്തിന് വിലയുണ്ട് എന്ന് ഓരോ പെൺകുട്ടിയും സ്വന്തം മനസ്സിനെ സ്വയം ബോധ്യപ്പെടുത്തണം.

Reena VR

Sr. Therapist

THE INSIGHT CENTRE

Trivandrum

8590043039