മഹേഷ് ഭട്ട് സിനിമയിലെ ഡോണ്‍, നിരവധി പേരുടെ ജീവിതം തകര്‍ത്തെന്ന് നടി
മഹേഷ് ഭട്ടിന്റെ നിയമങ്ങള്‍ അനുസരിച്ചില്ലെങ്കില്‍ ജീവിതം പ്രയാസത്തിലാകും, അവസരങ്ങള്‍ ഇല്ലാതാകുമെന്ന് ലുവിയേന
ബോളിവുഡ് സംവിധായകനും നിര്‍മാതാവുമായ മഹേഷ് ഭട്ടിനെതിരെ ഗുരുതര ആരോപണവുമായി നടിയും ബന്ധുവുമായ ലുവിയേന ലോധ്. മഹേഷ് ഭട്ട് ബോളിവുഡ് സിനിമയിലെ ഡോണ്‍ ആണെന്നും നിരവധി പേരുടെ ജീവിതം തകര്‍ത്തെന്നും ലുവിയേന ആരോപിച്ചു. ലുവിയേനക്കെതിരെ നിയമ നടപടിയെടുക്കുമെന്ന് മഹേഷ് ഭട്ടിന്റെ അഭിഭാഷകന്‍ മറുപടി നല്‍കി.
മഹേഷ് ഭട്ടിന്റെ അനന്തരവന്‍ സുമിത്ത് സബര്‍വാളിന്‍റെ ഭാര്യയാണ് ലുവിയേന. സുമിത്ത് ബോളിവുഡില്‍ മയക്കുമരുന്ന് വിതരണം ചെയ്യുന്നുവെന്ന് അറിഞ്ഞതോടെ താന്‍ വിവാഹമോചനത്തിന് അപേക്ഷ നല്‍കി. മഹേഷ് ഭട്ടിന് സുമിത്തിന്‍റെ മയക്കുമരുന്ന് വിതരണത്തെ കുറിച്ച് അറിയാം. മഹേഷ് ഭട്ടും കുടുംബവും തന്നെ ഉപദ്രവിക്കുകയും വീട്ടില്‍ നിന്ന് പുറത്താക്കാന്‍ ശ്രമിക്കുകയുമാണെന്ന് ലുവിയേന പറഞ്ഞു.
സിനിമാ വ്യവസായത്തിലെ ഏറ്റവും വലിയ ഡോണാണ് മഹേഷ് ഭട്ട്. ഈ സംവിധാനത്തെ നിയന്ത്രിക്കുന്നത് തന്നെ അയാളാണ്. മഹേഷിന്റെ നിയമങ്ങള്‍ അനുസരിച്ചില്ലെങ്കില്‍ നമ്മുടെ ജീവിതം പ്രയാസത്തിലാകും. സിനിമയില്‍ അവസരമില്ലാതാകും. നിരവധി പേരുടെ ജീവിതമാണ് മഹേഷ് ഭട്ട് ഇത്തരത്തില്‍ തകര്‍ത്തത്. അയാളുടെ ഒരു ഫോണ്‍ കോള്‍ മതി ജോലി ഇല്ലാതാകാന്‍- ലുവിയേന പറഞ്ഞു.
മഹേഷ് ഭട്ടിനെതിരെ കേസ് കൊടുത്തപ്പോള്‍ വീട്ടില്‍ അതിക്രമിച്ചുകയറി തന്നെ പുറത്താക്കാന്‍ ശ്രമിച്ചു. തന്‍റെ പരാതിയില്‍ പൊലീസ് ഒരു നടപടിയും ഇതുവരെ എടുത്തിട്ടുമില്ല. തന്റെയും കുടുംബത്തിന്റെയും സുരക്ഷയെ കരുതിയാണ് വീഡിയോയില്‍ എല്ലാം വെളിപ്പെടുത്തിയത്. നാളെ തനിക്കോ കുടുംബത്തിനോ എന്തെങ്കിലും സംഭവിച്ചാല്‍ ഉത്തരവാദികള്‍ മഹേഷ് ഭട്ട്, മുകേഷ് ഭട്ട്, സുമിത്, സഹില്‍ സെഗാള്‍, കുംകും സെഗാള്‍ എന്നിവരായിരിക്കുമെന്നും ലുവിയേന പറഞ്ഞു.
എന്നാല്‍ ലുവിയേനയുടെ ആരോപണം മഹേഷ് ഭട്ടിന്റെ അഭിഭാഷകന്‍ തള്ളി. മഹേഷ് ഭട്ടിനെ അപകീര്‍ത്തിപ്പെടുത്തിയതിനെതിരെ പരാതി നല്‍കുമെന്നും അഭിഭാഷകന്‍ പറഞ്ഞു. 2010ല്‍ പൂജ ഭട്ട് സംവിധാനം ചെയ്ത കജ്‍രരെയിലൂടെയാണ് ലുവിയേന സിനിമയിലെത്തിയത്.