മലയാളി ഭൗതികശാസ്ത്രജ്ഞന് പ്രൊഫ. താണു പത്മനാഭന് അന്തരിച്ചു
സംസ്ഥാന സര്ക്കാരിന്റെ ഉയര്ന്ന ശാസ്ത്ര ബഹുമതിയായ കേരള ശാസ്ത്ര പുരസ്കാരം ഈ വര്ഷം പ്രൊഫ. താണു പത്മനാഭന് ലഭിച്ചിരുന്നു
ലോകപ്രശസ്ത ഭൗതികശാസ്ത്രജ്ഞന് പ്രൊഫ. താണു പത്മനാഭന്(64) അന്തരിച്ചു. തിരുവനന്തപുരം സ്വദേശിയാണ്. ഹൃദയാഘാതത്തെ തുടര്ന്ന് പുണെയിലെ വീട്ടില് കുഴഞ്ഞുവീഴുകയായിരുന്നു. ആശുപത്രിയിലെത്തിച്ചെങ്കിലും മരിച്ചു. പുണെ ഇന്റര് യൂണിവേഴ്സിറ്റി സെന്റര് ഫോര് അസ്ട്രോണമി ആന്ഡ് ആസ്ട്രോഫിസിക്സിലെ അക്കാദമിക് വിഭാഗം ഡീനായിരുന്നു. അവിടെ തന്നെ ഡിസ്റ്റിംഗ്വിഷ്ഡ് പ്രൊഫസറായി സേവനം അനുഷ്ഠിക്കുകയായിരുന്നു. സംസ്ഥാന സര്ക്കാരിന്റെ ഉയര്ന്ന ശാസ്ത്ര ബഹുമതിയായ കേരള ശാസ്ത്ര പുരസ്കാരം ഈ വര്ഷം പ്രൊഫ. താണു പത്മനാഭന് ലഭിച്ചിരുന്നു.
എമര്ജന്റ് ഗ്രാവിറ്റിയില് താപഗതികത്തെ അടിസ്ഥാനമാക്കി സാമാന്യ ആപേക്ഷികസിദ്ധാന്തത്തെ കൂടുതല് വികസിപ്പിച്ചതാണ് താണു പത്മനാഭന്റെ ഏറ്റവും പ്രധാന സംഭാവന. 1957ല് തിരുവനന്തപുരത്താണ് താണു പത്മനാഭന് ജനിച്ചത്.
മുംബൈയിലെ ടിഐഎഫ്ആറില് നിന്ന് 1983ല് പി.എച്ച്.ഡി നേടി. 1992 മുതല് പുണെയിലെ ഇന്റര് യൂണിവേഴ്സിറ്റി സെന്റര് ഫോര് ആസ്ട്രോണമി ആന്ഡ് ആസ്ട്രോഫിസിക്സിലാണ്. സ്വിറ്റ്സര്ലൻഡിലെ പ്രസിദ്ധ കണികാ ഭൗതിക ഗവേഷണ കേന്ദ്രമായ സേണ്, ന്യൂ കാസില് സര്വകലാശാല, ലണ്ടനിലെ ഇംപീരിയല് കോളേജ്, കാള്ടെക്, പ്രിന്സ്ടണ്, കേംബ്രിഡ്ജ് സര്വകലാശാലകളില് വിസിറ്റിങ് പ്രൊഫസറായിരുന്നു.
Adjust Story Font
16