ഐശ്വര്യ ലക്ഷ്മി നായികയായി 'അമ്മു' ആമസോൺ പ്രൈമിൽ; റിലീസ് തിയതി പ്രഖ്യാപിച്ചു

ആമസോൺ പ്രൈം വീഡിയോയുടെ ആദ്യ തെലുഗ് ഒറിജിനൽ ചിത്രം 'അമ്മു'വിന്‍റെ റിലീസ് പ്രഖ്യാപിച്ചു. ചിത്രം ഒക്ടോബർ 19 മുതല്‍ ആമസോണ്‍ പ്രൈമില്‍ സ്ട്രീം ചെയ്യും. ഇന്ത്യയിലും 240ലധികം രാജ്യങ്ങളിലും പ്രദേശങ്ങളിലും പ്രൈം അംഗങ്ങൾക്ക് തെലുഗിന് പുറമെ തമിഴ്, മലയാളം, കന്നഡ, ഹിന്ദി ഭാഷകളിൽ ചിത്രം സ്ട്രീം ചെയ്യും. പ്രതികൂല സാഹചര്യങ്ങളെ അതിജീവിച്ച് ഒരു ഫീനിക്സിനെപ്പോലെ ചിറകടിച്ചുയര്‍ന്ന ഒരു സ്ത്രീയുടെ കരുത്ത് പകരുന്ന കഥയാണ് ചിത്രം പറയുന്നത്. ഗാർഹിക പീഡനത്തിന് ഇരയാകുന്ന സ്ത്രീയുടെ ആന്തരിക സംഘർഷങ്ങളും അതില്‍ അതിജീവിക്കുകയും ആന്തരിക ശക്തി കണ്ടെത്തുകയും ദുരുപയോഗിക്കുന്ന ഭർത്താവിനോട് പ്രതികാരം ചെയ്യുന്ന ഒരു സ്ത്രീയുടെ പരിവർത്തനമാണ് 'അമ്മു' കാണിക്കുന്നത്.

സ്റ്റോൺ ബെഞ്ച് ഫിലിംസിന്‍റെ ബാനറിൽ കല്യാൺ സുബ്രഹ്മണ്യം, കാർത്തികേയൻ സന്താനം എന്നിവരാണ് ചിത്രം നിർമ്മിക്കുന്നത്. ചാരുകേഷ് ശേഖർ ആണ് ചിത്രത്തിന്‍റെ രചനയും സംവിധാനവും നിർവഹിച്ചത്. ജനപ്രിയ ക്രിയേറ്റീവ് പ്രൊഡ്യൂസര്‍ കാർത്തിക് സുബ്ബരാജും നിര്‍മാണത്തില്‍ പങ്കാളിയാണ്.

പല കാരണങ്ങളാലും അമ്മു ഞങ്ങൾക്ക് സവിശേഷമാണെന്ന് പ്രൈം വീഡിയോയുടെ ഇന്ത്യ ഒറിജിനൽസ് ഹെഡ് അപർണ പുരോഹിത് പറഞ്ഞു. "ഇത് ഞങ്ങളുടെ ആദ്യ തെലുഗ് ഒറിജിനൽ സിനിമ മാത്രമല്ല, കടന്നുപോയതിൽ ഞങ്ങൾ ത്രില്ലടിക്കുന്ന ഒരു അനുഭവമാണ്. സ്ത്രീകളുടെ ശക്തിയിലും പ്രതിരോധശേഷിയിലും ശ്രദ്ധ കേന്ദ്രീകരിക്കുന്ന പ്രധാനപ്പെട്ടതും പ്രസക്തവുമായ ഒരു കഥ കൂടിയാണ് ചിത്രം പറയുന്നത്. പുത്തം പുതുകാലൈ, മഹാന്‍ എന്നീ ചിത്രങ്ങള്‍ക്ക് ശേഷം കാര്‍ത്തിക് സുബ്ബരാജുമായുള്ള ഞങ്ങളുടെ അടുത്ത സഹകരണം കൂടിയാണീ ചിത്രം. ചിത്രത്തില്‍ ഐശ്വര്യ ലക്ഷ്മി, നവീൻ ചന്ദ്ര, സിംഹ എന്നിവർ മികച്ച പ്രകടനം കാഴ്ചവെച്ചു. പ്രൈം വീഡിയോയിൽ, ഈ കഥ ഇന്ത്യയിലെ മാത്രമല്ല, ലോകമെമ്പാടുമുള്ള ഞങ്ങളുടെ പ്രേക്ഷകരിലേക്ക് എത്തിക്കുന്നതിൽ ഞങ്ങൾ ആവേശഭരിതരും അഭിമാനമുള്ളവരുമാണ്"; അപർണ പുരോഹിത് പറഞ്ഞു.

ഒരു സിനിമ എന്ന നിലയിൽ അമ്മു ഒരു റിവഞ്ച് ത്രില്ലർ ആണ്. ഒരു നാടകത്തിൽ നിന്ന് പ്രചോദനം ഉൾക്കൊണ്ട, ജീവിതം പ്രവചനാതീതമാണെന്ന സന്ദേശം നൽകുന്ന ഈ ചിത്രം പ്രേക്ഷകരെ ആവേശത്തിന്‍റെ മുള്‍മുനയില്‍ എത്തിക്കും. ഐശ്വര്യ, നവീൻ, സിംഹ എന്നിവർക്കൊപ്പം ഇൻഡസ്ട്രിയിലെ ചില മികച്ച അഭിനേതാക്കളുടെ മികച്ച പ്രകടനവും ഈ ചിത്രത്തിലുണ്ട്. വൈകാരികമായ കാമ്പിനെ നിലനിർത്തിക്കൊണ്ട് ഈ രസകരവും പ്രധാനപ്പെട്ടതുമായ കഥ അവതരിപ്പിച്ചതിന് ചാരുകേഷ് ശേഖറിനെ അഭിനന്ദിക്കുന്നതായി ക്രിയേറ്റീവ് പ്രൊഡ്യൂസർ കാർത്തിക് സുബ്ബരാജ് പറഞ്ഞു. ആമസോണ്‍ പ്രൈം വീഡിയോയിലൂടെ 240 രാജ്യങ്ങളില്‍ ചിത്രം പ്രദര്‍ശനത്തിനെത്തും.