പെർഫെക്ഷനു വേണ്ടിയുള്ള നീണ്ട കാത്തിരിപ്പ് അവസാനിച്ചു; അൽഫോൻസ് പുത്രന്‍റെ ഗോൾഡ് ഡിസംബറിൽ തിയറ്ററുകളിലേക്ക്
പൃഥ്വിരാജിന് ഒപ്പമുള്ള ചിത്രം പങ്കുവെച്ചാണ് ബാബുരാജ് ഇക്കാര്യം അറിയിച്ചത്
ആരാധകരുടെ കാത്തിരിപ്പിന് വിരാമമിട്ടുകൊണ്ട് അല്‍ഫോന്‍സ് പുത്രന്‍ ചിത്രം 'ഗോള്‍ഡ്' ഉടന്‍ പ്രേക്ഷകരിലേക്ക്. ഡിസംബറില്‍ ചിത്രം റിലീസ് ചെയ്യും. നടൻ ബാബുരാജ് ആണ് ഗോൾഡ് സിനിമയുടെ റിലീസ് സംബന്ധിച്ച സൂചന നൽകിയത്. പെർഫെക്ഷനു വേണ്ടിയുള്ള നീണ്ട കാലത്തെ കാത്തിരിപ്പ് അവസാനിച്ചെന്നും അൽഫോൻസ് പുത്രനും ടീമിനും അഭിനന്ദനം എന്ന് കുറിച്ച ബാബുരാജ് ഡിസംബറിൽ ഗോൾഡ് റിലീസ് ആകുമെന്നും അറിയിച്ചു. പൃഥ്വിരാജിന് ഒപ്പമുള്ള ചിത്രം പങ്കുവെച്ചാണ് ബാബുരാജ് ഇക്കാര്യം അറിയിച്ചത്.
സൂപ്പര്‍ഹിറ്റ് ചിത്രം പ്രേമത്തിനു ശേഷം അല്‍ഫോന്‍സ് ഒരുക്കുന്ന ചിത്രമായതുകൊണ്ടു തന്നെ പ്രതീക്ഷകള്‍ വാനോളമുണ്ട്. ഏഴു വർഷത്തെ ഇടവേളയ്ക്ക് ശേഷമാണ് ഒരു അല്‍ഫോന്‍സ് ചിത്രം വരുന്നത്. ചിത്രത്തിന്‍റെതായി പുറത്തിറങ്ങിയ ടീസറും പോസ്റ്ററും പ്രതീക്ഷകള്‍ കൂട്ടി. ആദ്യം ഓണത്തിന് ചിത്രം റിലീസ് ചെയ്യുമെന്ന് അറിയിച്ചിരുന്നെങ്കിലും പിന്നീട് തിയതിയില്‍ മാറ്റം വരുത്തുകയായിരുന്നു. ചിത്രത്തിന്‍റെ പ്രീപ്രൊഡക്ഷന്‍ വര്‍ക്കുകള്‍ പൂര്‍ത്തിയാകാത്തതുകൊണ്ടായിരുന്നു റിലീസ് നീട്ടിയത്. ഓണം കഴിഞ്ഞ് ഒരാഴ്ചക്ക് ശേഷമായിരിക്കും ചിത്രം റിലീസ് ചെയ്യുമെന്നും അറിയിച്ചിരുന്നു. എന്നാല്‍ റിലീസ് വീണ്ടും നീണ്ടുപോവുകയായിരുന്നു.
ചിത്രം എപ്പോള്‍ റിലീസ് ചെയ്യുമെന്ന ആരാധകന്‍റെ ചോദ്യത്തിന് അല്‍ഫോന്‍സ് നേരത്തെ മറുപടി നല്‍കിയിരുന്നു. "കുറച്ചുകൂടി വര്‍ക്ക് തീരാനുണ്ട് ബ്രോ. കുറച്ച് സിജി. കുറച്ച് മ്യൂസിക്, കുറച്ച് കളറിംഗ്.. കുറച്ച് അറ്റകുറ്റപ്പണികള്‍ ബാലൻസ് ഉണ്ട്. അത് തീരുമ്പോള്‍ തന്നെ ഞാൻ ഡേറ്റ് പറയാം. അതുവരെ ക്ഷമിക്കണം ബ്രോ. ഓണം ആയിരുന്നു തിയേറ്ററില്‍ നിന്ന് സജസ്റ്റ് ചെയ്‍ത ഡേറ്റ്. പക്ഷേ അന്ന് വര്‍ക്ക് തീര്‍ന്നില്ല. വേവാത്ത ഭക്ഷണം ആര്‍ക്കും ഇഷ്‍ടമാവില്ല ബ്രോ. അതുകൊണ്ട് നല്ലോണം വെന്തിട്ട് തരാം എന്ന് കുക്ക് ആയ ഞാൻ തീരുമാനിച്ചു. തീയതി പ്രഖ്യാപിച്ച് റിലീസ് ചെയ്യാത്തതില്‍ ഖേദിക്കുന്നു." എന്നായിരുന്നു അല്‍ഫോന്‍സിന്‍റെ മറുപടി.
പൃഥ്വിരാജും നയന്‍താരയും ആദ്യമായി ഒന്നിക്കുന്ന ചിത്രം കൂടിയാണ് ഗോള്‍ഡ്. ജോഷി എന്ന കഥാപാത്രമായി പൃഥ്വിയെത്തുമ്പോള്‍ സുമംഗലി ഉണ്ണിക്കൃഷ്ണനായി നയന്‍സും അഭിനയിക്കുന്നു. അജ്മല്‍ അമീര്‍,കൃഷ്ണ ശങ്കര്‍, ശബരീഷ് വര്‍മ, ചെമ്പന്‍ വിനോദ് ജോസ്, വിനയ് ഫോര്‍ട്ട്,റോഷന്‍ മാത്യു, മല്ലിക സുകുമാരന്‍, ദീപ്തി സതി, ബാബുരാജ്, ലാലു അലക്സ്, ജഗദീഷ്, സൈജു കുറുപ്പ്, സുരേഷ് കൃഷ്ണ, ശാന്തി കൃഷ്ണ, ഷമ്മി തിലകന്‍, അബു സലിം തുടങ്ങി വന്‍താരനിര തന്നെയാണ് ചിത്രത്തിനു വേണ്ടി അണിനിരന്നിട്ടുണ്ട്. പൃഥ്വിരാജ് പ്രൊഡ്കഷന്‍സ്, മാജിക് ഫ്രെയിംസ് എന്നിവയുടെ ബാനറില്‍ സുപ്രിയ മേനോനും ലിസ്റ്റിന്‍ സ്റ്റീഫനും ചേര്‍ന്നാണ് ചിത്രം നിര്‍മിക്കുന്നത്. സംഗീതം-രാജേഷ് മുരുഗേശന്‍, ക്യാമറ- ആനന്ദ് സി. ചന്ദ്രന്‍, വിശ്വജിത്ത് ഒടുക്കത്തില്‍. മലയാളത്തിലും തമിഴിലും ഒരേസമയം റിലീസ് ചെയ്യുന്നു എന്നതാണ് ഈ സിനിമയുടെ മറ്റൊരു പ്രത്യേകത.
Adjust Story Font
16
