'ചിലർ വാടക ഗുണ്ടക​ളെ പോലെ പെരുമാറുന്നു': ഓൺലൈൻ നിരൂപകരെ വിമർശിച്ച്​ ലാൽ ജോസ്​

ദുബൈ: ഓൺലൈൻ രംഗത്ത്​ പ്രവർത്തിക്കുന്ന ചില നിരൂപകർ വാടകക്കൊലയാളികളെയും ഗുണ്ടകളെയും പോലെയാണ്​ പ്രവർത്തിക്കുന്നതെന്ന്​ സംവിധായകൻ ലാൽ ജോസ്. 'സോളമന്‍റെ തേനീച്ചകൾ' എന്ന പുതിയ ചിത്രത്തിന്‍റെ ഗൾഫ് റിലീസിന് മുന്നോടിയായി ദുബൈയിൽ മാധ്യമങ്ങളോട്​ സംസാരിക്കുകയായിരുന്നു അദ്ദേഹം.

പണം നല്‍കുന്നവരുടെ സിനിമയെ കുറിച്ച്​ മാത്രമാണ്​ ചില നിരൂപകർ നല്ലത് പറയുന്നതെന്ന്​ ലാൽജോസ്​ തുറന്നടിച്ചു. മറ്റുള്ളവരെ തകർക്കാ​ൻ എല്ലാ തരത്തിലും തെറ്റായ അഭിപ്രായം പ്രചരിപ്പിക്കുകയാണിവരെന്നും ലാൽ ജോസ്​ കുറ്റപ്പെടുത്തി. വിമർശകരെയും നിരൂപകരെയും മുന്നിൽ കണ്ട്​ സിനിമയെടുക്കേണ്ട സാഹചര്യമാണ്​ ഇന്നുള്ളത്​. മുൻ കാലങ്ങളിൽ ഇത്തരത്തിലായിരുന്നില്ല. ഓരോ വർഷവും 200ലേറെ സിനിമകൾ മലയാളത്തിലിറങ്ങുന്ന സാഹചര്യം ഉണ്ട്​. പുതുകാല സിനിമാ പ്രളയത്തിൽ പിടിച്ചു നിൽക്കാനാണ്​ വർഷങ്ങളുടെ അനുഭവ സമ്പത്തുള്ള തന്നെ പോലുള്ളവർ നീക്കം നടത്തുന്നതെന്നും ലാൽ ജോസ്​ കൂട്ടിച്ചേർത്തു.

'സ്റ്റാർ ഹോളിഡെയ്സ് ഫിലിംസാണ് 'സോളമന്‍റെ തേനീച്ചകൾ' ജി.സി.സിയിൽ വിതരണം ചെയ്യുന്നത്. നാട്ടിൽ നല്ല പ്രേക്ഷക പ്രതികരണം നേടിയ ഫാമിലി സസ്പെൻസ് ത്രില്ലർ പ്രവാസലോകത്തും സ്വീകരിക്കപ്പെടുമെന്ന്​ പ്രതീക്ഷിക്കുന്നതായി ചിത്രത്തിൽ പ്രധാനകഥാപാത്രമായി എത്തുന്ന ദർശന, വിൻസി, ശംഭു, ആഡിസ് എന്നീ പുതുമുഖ താരങ്ങളും പ്രത്യാശ പ്രകടിപ്പിച്ചു.