സോഷ്യൽ മീഡിയയിൽ തരംഗമായി ‘തൂവെള്ള തട്ടം’; ആർദ്ര മധുര സംഗീതവുമായി ഷെമീർ മടത്തറയിൽ

സമൂഹമാധ്യമങ്ങളിൽ തരംഗമായി പ്രവാസി മലയാളി സംഗീതം നൽകി ആലപിച്ച ‘തൂവെള്ള തട്ടം’ എന്ന ആൽബം ഗാനം. അബുദാബിയിൽ ജോലി ചെയ്യുന്ന ഷമീർ മടത്തറയിൽ ആണ്​ ആർദ്ര മധുരമായ ഈ പ്രണയഗാനത്തിന്‍റെ ശിൽപ്പി. യൂട്യൂബിലും ഇൻസ്റ്റാഗ്രാമിലും ​ലക്ഷക്കണക്കിന്​ വ്യൂസ്​ ആണ്​ ഗാനത്തിന്​ ലഭിച്ചത്​. ഗാനത്തിന്‍റെ വരികൾ രചിച്ചിരിക്കുന്നത്​ ഫൈസൽ പൊന്നാനിയാണ്​.

ഷെമീറിനൊപ്പം പള്ളിക്കൽ സ്വദേശി നിജ നിഷാനാണ്​ ഗാനം ആലപിച്ചിരിക്കുന്നത്​. യു.എ.ഇ ഇശൽ ബാൻഡ് അബുദാബിയുടെ ഗായികകൂടിയായ നിജ​ നേരത്തേയും നിരവധി ഹിറ്റ്​ ഗാനങ്ങൾ ആലപിച്ചിട്ടുണ്ട്​. പശ്ചാത്തല സംഗീതം സിബു സുകുമാരൻ നിർവ്വഹിച്ചിരിക്കുന്നു. സോഷ്യൽ മീഡിയ ഇൻഫ്ലുവെൻസർമാരായ വിനീത് രാമചന്ദ്രൻ ഭാര്യ ചിഞ്ചു വിനീത് എന്നിവരാണ്​ ആൽബത്തിൽ അഭിനയിച്ചിരിക്കുന്നത്​.

200 ൽ അധികം പാട്ടുകളിൽ പിന്നണി ഗായകനായും ഗാന രചയിതാവായും സംഗീത സംവിധായകനായും പ്രവർത്തിച്ചിട്ടുള്ളയാളാണ്​ ഷെമീർ മടത്തറയിൽ. ഇപ്പോൾ വൈറലായ ‘തൂവെള്ള തട്ടം’ ആൽബം കൂടാതെ ‘മിന്നത്തൊളി’, ‘തൊടാതെ’, ‘റൂഹിൽ നീ മതി’, ‘മിഴി രണ്ടിലും’ തുടങ്ങിയ ഗാനങ്ങളും സോഷ്യൽ മീഡിയ ട്രെൻഡിംഗ് ലിസ്റ്റിൽ ഷെമീറിന്‍റേതായി ഇടംപിടിച്ചിട്ടുണ്ട്​. മലയാളത്തിലെ നിരവധി പിന്നണി ഗായകർക്കൊപ്പം പ്രവർത്തിച്ചിട്ടുള്ള ഷെമീർ സിനിമാക്സ് എന്റർടൈൻമെന്റ് എന്ന പ്രൊഡക്ഷൻ ആൻഡ്​ മാർക്കറ്റിങ് കമ്പനി ഫൗണ്ടർ കൂടിയാണ്.